Belçikanın Baş naziri büdcə razılaşması alınmadığı üçün istefa verə bilər

Belçikanın Baş naziri Bart De Vever noyabrın 2-də səhər Kral Filiplə görüşdə istefa verə bilər.

"PostMedia" "De Standaard"a istinadən xəbər verir ki, hökumət bir gün əvvəl büdcə üzrə razılaşmanı təsdiq edə bilməyib. Nəşr məlumatı adını açıqlamayan mənbələrə əsaslanaraq yayıb. De Vever "Yeni Flamand Alyansı" partiyasının nümayəndəsidir.

Koalisiyadakı "Vooruit" sosial-demokrat partiyasının nümayəndəsi bildirib ki, müzakirəyə təqdim olunan büdcə təşəbbüsləri balanslı deyil.

"Biz adi insanlara, səhiyyə sektoruna və pensiyaçılara müəyyən qorunma təmin edəcək razılaşma istəyirik. Amma hazırda masanın üstündə olan kifayət deyil", — deyə nəşrin həmsöhbəti bildirib.

"De Standaard" qeyd edir ki, De Veverin vəzifəni tərk etmək qərarı ölkədə dərhal seçkilərin keçiriləcəyi anlamına gəlmir. Kral istefanın qəbulunu təxirə sala və tərəfləri büdcə üzrə danışıqları davam etdirməyə çağıra bilər.

Söhbət Belçikanın növbədənkənar büdcəsindən gedir. Mübahisə 2029-cu ilə qədər büdcə xərclərinin ixtisarı və vergilərin artırılması hesabına 10 milyard avro əldə edilməsi planı ətrafında gedir. Bu addımda De Vever israr edir və hesab edir ki, o, kəsirin qarşısını almalı və dövlət borcunun artımını saxlamalıdır.

Belçikanın dövlət borcu 735 milyard avrodan çoxdur və ölkənin ÜDM-inin 110 faizindən artıqdır. Aİ-nin icazə verdiyi hədd isə 60 faizdir.

Foto: Коммерсантъ