"Apple" Almaniya siyasətçilərini smartfonların sındırıla biləcəyi barədə xəbərdar edib

Almaniya hökumətinin üzvləri və Bundestaqın deputatları "iPhone" smartfonlarına casus proqramın yeridilməsi ehtimalı barədə "Apple" şirkətindən xəbərdarlıq alıblar.

"PostMedia" xəbər verir ki, Almaniyanın rəqəmsal texnologiyalar naziri Karsten Vildberqer bu barədə "Bericht aus Berlin" proqramında danışıb.

"Bəzi cihazlar, ehtimal ki, təhlükəyə məruz qalıb", — deyə Vildberqer bildirib.

Federal İnformasiya Təhlükəsizliyi İdarəsinin (BSI) sənədlərinə əsasən, "Apple" belə bildirişləri oktyabrın 29-dan göndərməyə başlayıb. Bildirişlərdə "Mercenary Spyware" adlanan kommersiya casus proqramından istifadə etməklə hücum ehtimalı barədə xəbərdarlıq edilir. Bu cür proqram təminatı cihazlara icazəsiz daxil olmaq üçün istifadə olunur. O, mesajlaşma proqramlarındakı yazışmaları gizli oxumağa, geolokasiyanı izləməyə, həmçinin cihazın mikrofonunu və kamerasını işə salmağa qadirdir.

Hücumun həqiqətən uğurlu olub-olmadığı "Apple"ın bildirişlərində göstərilmir. Hücumun arxasında kimin dayandığı da məlum deyil.

"Hazırda bu bildirişlərin konkret səbəbi və ön tarixçəsi barədə daha ətraflı məlumatımız yoxdur", — BSI-dən bildirilib.

"Bild"in qeyd etdiyinə görə, hadisə noyabrın 2-3-də Berlində keçiriləcək hökumət səviyyəli "Rəqəmsal sammit"də müzakirə mövzusuna çevrilə bilər.

Foto: Europäische Kommission - Audiovisueller Dienst, Claudio Centonze, Yügen, CE - Se