Yaponiyada mobil rabitə üçün uçan qüllə uğurla sınaqdan keçirilib

"Sceye" şirkəti gələcəyin rabitə sisteminin prototipinin sınaq uçuşunu uğurla başa çatdırıb. Bu sistem stasionar rabitə qüllələri ilə peyklər arasında aralıq həlqə rolunu oynayacaq. Söhbət rabitə təmin edən və genişzolaqlı internet yayan dirijabl əsaslı uçan sistemdən gedir. Hərəkətli olması ilə yanaşı, belə bir sistem yerüstü qüllə ilə müqayisədə təxminən 500 dəfə daha geniş əhatə dairəsi təmin edir. Bu, yerdə hər hansı bir obyektin tikintisinin çətin və ya iqtisadi cəhətdən sərfəli olmadığı ərazilər üçün ideal variantdır.

"PostMedia" xəbər verir ki, bu barədə “Texkult” məlumat yayıb.

Hazırda bir neçə şirkət uçan retranslyatorlar üzərində işləyir, lakin onların hamısı idarə edilməsinin daha asan olması səbəbindən havadan ağır uçuş aparatlarına üstünlük verir. Dirijablın isə başqa üstünlükləri var: o, daha ucuzdur və yükdaşıma qabiliyyəti xeyli yüksəkdir. Buna görə də onun üzərində daha böyük antenalar və digər faydalı avadanlıqlar yerləşdirmək mümkündür. Avtonomluq baxımından müqayisə aparmaq çətindir, çünki təyyarələr də günəş panellərindən istifadə edir və uzun müddət havada qala bilir.

Əhəmiyyətli məqam ondan ibarətdir ki, Sceye şirkətinin dirijablında ilk dəfə təkcə rabitə avadanlıqları deyil, həm də server, zənglərin marşrutlaşdırılmasını və məlumat ötürülməsini idarə edən əsas sistem yerləşdirilib. Məlumatları emal olunmaq üçün yerüstü serverə göndərib cavab gözləmək əvəzinə, sistem bir sıra hesablamaları özü həyata keçirir. Nəticədə istifadəçilər üçün cavab müddəti 40% azalaraq 68 millisaniyəyə düşüb.

Gələcəkdə vəziyyət daha da yaxşılaşacaq. Çünki uçan rabitə sistemi geostasionar peyklərin funksiyalarının bir hissəsini öz üzərinə götürə biləcək. Üstəlik, o, Yer səthindəki istifadəçiyə peyklərlə müqayisədə 1800 dəfə daha yaxın olacaq ki, bu da siqnalın ötürülmə müddətini azaldacaq.

Dirijablın prototipi tam avtonom rejimdə işləyib və ABŞ-dan Yaponiyaya uçuş həyata keçirib. Yaponiyanın aparıcı rabitə operatoru SoftBank-ın əməkdaşları həmin ölkədə sistemin işini hərtərəfli sınaqdan keçiriblər.

Bundan əlavə, əlverişli hava şəraitində radio siqnalları əvəzinə işıqdan istifadə etmək məqsədilə dirijabla lazer rabitəsi sistemi yaratmaq istiqamətində də sınaqlar aparılıb.

Bütün sınaqların nəticələri o qədər təsirli olub ki, SoftBank artıq 2027-ci ildə uçan rabitə sistemləri əsasında kommersiya xidmətinə başlayacağını elan edib.