"Microsoft" təxminən 60 min əməkdaşı işdən çıxarmaq istəyir

Amerikanın texnologiya nəhəngi "Microsoft" bütün dünyada çalışan əməkdaşlarına kompensasiya müqabilində könüllü olaraq şirkətdən ayrılmağı təklif edir.

"PostMedia" xarici KİV-lərə istinadən xəbər verir ki, bu barədə bazar ertəsi şirkətin insan resursları direktoru məlumat verib.

“Euronews”un məlumatına görə, əməkdaşlara göndərilən xidməti məktubda Emi Koulman “Voluntary Exit Offer” proqramını transformasiyaya yanaşmanın dəyişdirilməsi, daha çox çevikliyin yaradılması və əməkdaşlara növbəti peşəkar mərhələlərini müəyyənləşdirmək üçün əlavə imkanların verilməsi baxımından mühüm addım adlandırıb.

Təklif ABŞ, Kanada, Hindistan və Böyük Britaniyada fəaliyyət göstərən müəyyən komandaların “70 və daha aşağı səviyyəli” əməkdaşlarına şamil olunacaq. Bu o deməkdir ki, proqramda bəzi rəhbər vəzifəli şəxslər də iştirak edə bilərlər.

“Bu, müddəti məhdud olan könüllü proqramdır. Proqramda iştirak etmək hüququ olan əməkdaşlara maliyyə dəstəyi və karyera planlaşdırılması üzrə resurslar əldə etməklə Microsoft-dan ayrılmaq imkanı verilir”, – deyə məktubda bildirilib.

Qeyd olunub ki, yaxın saatlarda proqramın şərtlərinə uyğun gələn əməkdaşlara elektron poçt vasitəsilə təklifin təfərrüatları ilə tanış olmaq üçün keçid göndəriləcək.

Məlumata görə, proqramda təxminən 60 min əməkdaş iştirak etmək hüququna malik olacaq.

Microsoft iyul ayında təxminən 4 800 iş yerinin ixtisar edildiyini açıqlamışdı. Bu, həmin dövrdə şirkətin dünya üzrə ümumi işçi qüvvəsinin təxminən 2,1 faizini təşkil edirdi. Şirkət süni intellektin rolunun artdığı bir vaxtda biznesini yenidən istiqamətləndirmək və xərcləri azaltmaq məqsədi daşıyırdı. Həmin ixtisarlar əsasən şirkətin satış bölməsinə və Xbox oyun biznesinə təsir göstərmişdi.

Microsoft bu il bəzi əməkdaşlarına vaxtından əvvəl təqaüdə çıxmaq imkanı da yaradıb.

Şirkətin məlumatına görə, erkən təqaüd proqramında iştirak etmək hüququ olan əməkdaşların 30 faizindən çoxu təklifi qəbul edib. Korporasiya isə oxşar yanaşmaları araşdırmağa davam edəcəyini bildirib.