ABŞ-də məhkəmə 18 yaşında cinayət törətdiyinə görə ölüm cəzasına məhkum edilmiş qadının edamını son anda dayandırıb

ABŞ-nin Tennessi ştatında federal apellyasiya məhkəməsi qətl törətdiyi zaman 18 yaşında olan 50 yaşlı Krista Geyl Paykın edamını son anda dayandırıb. Edam çərşənbə günü həyata keçirilməli idi, lakin nəzərdə tutulan vaxtdan təxminən bir saat əvvəl məhkəmə Paykın uşaqlıq illərində məruz qaldığı cinsi zorakılıq tarixçəsinin ölüm hökmü çıxarılarkən lazımi qaydada nəzərə alınıb-alınmadığını araşdırmaq qərarına gəlib.

"PostMedia" xəbər verir ki, bu barədə “Associated Press” məlumat yayıb.

ABŞ-nin Altıncı Dairə Apellyasiya Məhkəməsi edamın dayandırılması barədə qərarı iki hakimin lehinə, bir hakimin əleyhinə səs verməsi ilə qəbul edib. Tennessi prokurorluğu dərhal ABŞ Ali Məhkəməsinə müraciət edərək qərarın ləğv olunmasını istəyib. Edamın şahidləri və jurnalistlər isə Ali Məhkəmənin qərarını gözləmək üçün Neşvildəki Riverbend ciddi rejimli həbsxanasında qalıblar.

Payk 1995-ci ildə 19 yaşlı Kollin Slemmerin qətlinə görə ölüm hökmünə məhkum edilmişdi. Payk və həmin vaxt 17 yaşında olan sevgilisi Slemmerə hücumda təqsirli biliniblər. Slemmer onların Noksvildəki peşə təhsili mərkəzindən tanışı olub. Payk öz təqsirini inkar etmir.

Edam həyata keçirilsəydi, Payk ən azı son 200 il ərzində Tennessi ştatında edam edilən ilk qadın olacaqdı. O, həmçinin ştatda müasir dövrdə 18 yaşında törətdiyi cinayətə görə edam edilən ilk şəxs olacaqdı.

Paykın müdafiəsi bildirir ki, hökm çıxarılarkən onun yaşı, psixoloji vəziyyəti və ağır uşaqlıq dövrü tam şəkildə nəzərə alınmalı idi. Vəkillərin sözlərinə görə, Payk erkən uşaqlıqdan cinsi zorakılığa məruz qalıb. Daha sonra ona bipolyar pozuntu və posttravmatik stress pozuntusu diaqnozu qoyulub.

Əfv olunması üçün təqdim etdiyi müraciətdə Payk yalnız Slemmerlə dalaşmaq niyyətində olduğunu, lakin hücum zamanı özünü idarə edə bilməyərək onu öldürdüyünü yazıb. O, törətdiyi cinayətə görə peşman olduğunu da bildirib.

Paykın işi hələ 1990-cı illərdə qətlin vəhşiliyi və qurbanın bədəninə beşguşəli ulduz həkk edilməsi səbəbindən geniş rezonans doğurmuşdu. Hadisə ABŞ-də cinayətlərin və gənclər subkulturasının satanizmlə tez-tez əlaqələndirildiyi “satanizm panikası” dövrünə təsadüf edib.

Kollin Slemmerin anası edamın həyata keçirilməsini dəstəkləyir və bu anı onilliklərdir gözlədiyini bildirib.

Bununla belə, apellyasiya məhkəməsinin qərarından sonra Paykın taleyi qeyri-müəyyən olaraq qalır. ABŞ Ali Məhkəməsi edamın dayandırılması barədə qərarın qüvvədə qalıb-qalmayacağına qərar verməlidir.