Rusiya "Google"a Rusiyada "Gemini" əmtəə nişanını qeydiyyatdan keçirməyə icazə verib

"Google"un müraciəti 2024-cü ilin avqustunda təqdim edilmişdi, lakin əvvəlcə qeydiyyatdan imtina olunmuşdu.

"PostMedia" xəbər verir ki, şirkət sonradan qərardan şikayət edib və əvvəlcədən qeydiyyatdan keçmiş "Gemini" nişanının sahibi olan Çexiyanın "Finshape Czechia" şirkətinin yazılı razılığını təqdim edib.

"Ruspatent"in qərarına əsasən, nişanlar arasında fonetik və semantik oxşarlıq olsa da, vizual fərqlər mövcuddur. Xidmətlərin təyinatı, auditoriyası və istifadə sahələri də fərqləndiyindən, "Finshape" şirkətinin razılığı nəzərə alınaraq "Google"un etirazı təmin edilib.

"Google" "Gemini" brendindən süni intellekt məhsulları, çat-botlar, neyron şəbəkə modelləri və süni intellekt köməkçiləri üçün istifadə edir. Şirkətin Rusiyada təqdim etdiyi digər üç "Gemini" qeydiyyat müraciəti üzrə mübahisələr isə hələ davam edir.

Qeydiyyat rüsumu ödənildikdən və nişan Dövlət Əmtəə Nişanları Reyestrinə daxil edildikdən sonra "Google" Rusiyada "Gemini" əmtəə nişanından istifadə etmək, üçüncü şəxslərin istifadəsini qadağan etmək, pozuntulara görə kompensasiya tələb etmək, həmçinin nişan hüquqlarını lisenziyalaşdırmaq və ya ötürmək hüququ əldə edəcək.