Sinqapurda ictimai nəqliyyatda “pis” davranışa görə 3900 dollara qədər cərimə tətbiq edilib

Sinqapurda ictimai nəqliyyatda davranış qaydaları sərtləşdirilib. Sərnişinlər yüksək səslə danışmaq və ya səs-küy salmaq, zibil atmaq, yemək və içki qəbul etmək, həmçinin oturacaqlara ayaqlarını qoymaq kimi hərəkətlərə görə cərimələnə bilərlər. Qayda pozuntusundan asılı olaraq cərimənin məbləği 5 min Sinqapur dollarına, yəni təxminən 3900 ABŞ dollarına çata bilər.

"PostMedia" xəbər verir ki, bu barədə “Jalopnik” nəşri məlumat yayıb.

Yeni tədbirlər son illərdə hakimiyyətin ictimai nəqliyyatda mərhələli şəkildə tətbiq etməyə başladığı qaydaların davamıdır. 2024-cü ilin dekabrında avtobuslarda sərnişinlərdən səs-küy salmamaq, yalnız bir yer tutmaq və yerə oturmamaq xahiş olunan elanlar yerləşdirilmişdi.

Ötən ilin oktyabrında Sinqapur parlamenti səlahiyyətli nəqliyyat şirkətlərinin əməkdaşlarına qayda pozuntularını müstəqil şəkildə qeydə almaq və məlumatı Quru Nəqliyyatı İdarəsinə təqdim etmək imkanı verən dəyişiklikləri qəbul edib. Eyni zamanda sürücülər qaydanı pozan sərnişini avtobusdan düşürə və ya polis çağıra bilərlər.

Musiqinin və ya telefonun səsini yüksək səviyyədə istifadə etmək, zibil atmaq, yemək və içki qəbul etmək, həmçinin ayaqları oturacağın üzərinə qoymaq kimi qayda pozuntularına görə 500 Sinqapur dollarınadək, yəni təxminən 390 ABŞ dolları məbləğində cərimə nəzərdə tutulur. Nəqliyyat xidmətlərinin əmlakına zərər vurulması və ya digər sərnişinlər üçün təhlükə yaradan hərəkətlərə görə isə cərimə 5 min dollara qədər ola bilər.

Sinqapur hakimiyyəti aydın qaydalarla maliyyə sanksiyalarının birləşdirilməsinin ictimai nəqliyyatdan istifadəni bütün sərnişinlər üçün daha rahat etməyə kömək edəcəyini gözləyir. Bununla belə, yeni cərimələrin effektivliyi hələ qiymətləndirilməlidir.

Lakin ictimai nəqliyyatda səs-küylə mübarizə aparan yeganə yer Sinqapur deyil. Qulaqlıqdan istifadə etmədən yüksək səslə musiqi dinləməyə məhdudiyyətlər, xüsusilə Pekin, Krakov və Torontoda tətbiq olunur. Fransanın Nant şəhərində bir kişi telefonun səsgücləndiricisi ilə danışdığı və stansiyada söhbətini dayandırmaqdan imtina etdiyi üçün təxminən 200 ABŞ dolları məbləğində cərimə ödəyib.

Londonda da qulaqlıqdan istifadə etmədən musiqi dinləyən və ya videolara baxan sərnişinlərə qarşı kampaniya keçirilib. Qaydanı pozanlar 1000 funt sterlinqədək cərimələnə və qatardan düşmələri tələb oluna bilər.