Qarabağ münaqişəsi ilə əlaqəli qanunsuz silahlar Avropa və Asiyada ələ keçirilib

Avropa və Mərkəzi Asiyada qanunsuz silah alverinə qarşı keçirilən əməliyyat zamanı 2 823 ədəd atıcı silah və yüngül silah, 400-ə yaxın əl qumbarası və partlayıcı vasitə, eləcə də 40 mindən çox döyüş sursatı ələ keçirilib.

"PostMedia" xəbər verir ki, İnterpolun koordinasiyası ilə iyunun 22-dən iyulun 5-dək keçirilən “Trigger X” əməliyyatı 17 ölkəni əhatə edib. Əməliyyat münaqişə zonalarında toplanmış silah ehtiyatlarının qanunsuz silah dövriyyəsinə uzunmüddətli təsirini üzə çıxarıb.

İstintaq tədbirləri davam etsə də, hazırda əldə olunan əməliyyat nəticələri ələ keçirilən qanunsuz silahların əhəmiyyətli hissəsinin keçmiş və ya hazırda davam edən silahlı münaqişə zonaları, o cümlədən Balkan regionu, Şərqi Avropa və Dağlıq Qarabağla əlaqəli olduğunu göstərir.

Ermənistan, Qırğızıstan və Tacikistanda sovet dövrünə aid bir sıra odlu silahlar da ələ keçirilib və ya könüllü şəkildə təhvil verilib.

Əməliyyat çərçivəsində silah saxlama və qanunsuz silah alveri, eləcə də narkotik ticarəti, miqrant qaçaqmalçılığı və quldurluq kimi digər cinayətlərlə əlaqədar 152 nəfər saxlanılıb. İnterpolun axtarış bildirişləri üzrə 15 nəfər müəyyən edilərək tutulub. Onlardan beşi beynəlxalq səviyyədə qırmızı bildirişlə axtarışda olan şəxslərdir. Gürcüstanda saxlanılan şəxslərdən biri qətldə şübhəli bilinərək Türkiyə tərəfindən axtarılır.

Əməliyyat zamanı toplanan məlumatlar göstərir ki, münaqişə zonaları həm qanuni bəyan edilmiş, həm də qanunsuz odlu silahların təyinat məntəqəsi ola bilər.

Bolqarıstanla Türkiyə arasındakı Lesovo sərhəd-keçid məntəqəsində gömrük əməkdaşları hərbi təyinatlı 1 000-dən çox ov tüfəngi daşıyan iki ağır yük avtomobilini saxlayıblar.

İnterpolun Polis Potensialının Gücləndirilməsi üzrə icraçı direktoru Harald Arm bildirib ki, “Trigger X” əməliyyatı silahlı münaqişələrdə istifadə olunan silahların mütəşəkkil cinayətkarlıq şəbəkələrinin əlinə keçməsi və başqa cinayətlərin törədilməsində istifadə olunması riskinin yüksək olduğunu üzə çıxarıb.

O qeyd edib ki, bu cür silahların ələ keçirilməsi qanunsuz daşınma marşrutlarının müəyyənləşdirilməsi, cinayətkar şəbəkələrin dağıdılması və silahların cinayət məqsədləri üçün istifadə etmək istəyən şəxslərə çatmasının qarşısının alınması baxımından beynəlxalq əməkdaşlığın əhəmiyyətini göstərir.

Bolqarıstanın gömrük əməkdaşları Türkiyə ilə sərhəddə yerləşən Kapitan Andreevo keçid məntəqəsində 73 saxta tapança da müsadirə ediblər. Silahlar Qərbi Avropaya avtomobil ehtiyat hissələri daşıyan yük maşınında aşkarlanıb. Onlardan 23-ü sürücünün döşəyinin altında gizlədilib.

Saxta odlu silahlar həqiqi modelləri təqlid etmək üçün hazırlanır. Mənşəyi gizlətmək və silahların müəyyənləşdirilməsini çətinləşdirmək məqsədilə onların üzərində saxta nişanlardan istifadə olunur. Bu xüsusiyyətlər həmin silahları cinayətkar şəbəkələr üçün cəlbedici edir.

Əməliyyat zamanı ümumilikdə 268 əl qumbarası da ələ keçirilib. Ən böyük müsadirə Serbiyada həyata keçirilib. Burada Bosniya və Herseqovinadan qanunsuz gətirilən 68 qumbara aşkarlanıb.

Serbiyada qaz və start tapançalarını odlu silahlara çevirən gizli emalatxana da müəyyən edilib. Əraziyə baxış zamanı bir nəfər saxlanılıb, onlarla tapança və tapança hissələri, həmçinin 9 mm-lik 280 patron müsadirə olunub.

Qanunsuz silah və əl qumbaraları ilə yanaşı, “Trigger X” əməliyyatı çərçivəsində Bolqarıstanda 20 şişmə qayıq da müsadirə edilib.

Qərbi Avropa ölkələrindən birinə şişmə döşəklər adı altında göndərilən yükün miqrant qaçaqmalçılığı ilə məşğul olan cinayətkar şəbəkələrlə əlaqəli olduğu və La-Manş boğazını gizli şəkildə keçmək üçün istifadə edilməsinin nəzərdə tutulduğu ehtimal edilir.

Şimali Makedoniyada beş qeyri-qanuni miqrant saxlanılıb. Serbiyanın sərhəd polisi isə Macarıstanla sərhədə yaxın ərazidə daha bir nəfəri tutub. Həmin şəxsin üzərində avtomatik tüfəng və bir neçə patron olub.

Əməliyyat zamanı kokain və marixuana kimi müxtəlif növ qanunsuz narkotik vasitələr, saxta siqaretlər, bəyan edilməmiş tekstil məhsulları və ərzaq məhsulları da ələ keçirilib.

“Trigger X” əməliyyatı Avropa İttifaqının “I ARMS V” layihəsi və Almaniya Xarici İşlər Nazirliyinin “I-FORCE” layihəsi çərçivəsində, eləcə də Qərbi Balkanlarda miqrant qaçaqmalçılığı və insan alverinə qarşı mübarizənin gücləndirilməsini dəstəkləyən Avropa İttifaqının “EU4FAST” layihəsinin köməyi ilə həyata keçirilib.

Əməliyyatda Albaniya, Ermənistan, Bosniya və Herseqovina, Bolqarıstan, Gürcüstan, Qazaxıstan, Qırğızıstan, Moldova, Monteneqro, Şimali Makedoniya, Pakistan, Polşa, Serbiya, İsveç, Tacikistan, Türkiyə və Ukrayna iştirak edib.

“Trigger X” əməliyyatına həmçinin EMPACT Firearms, Europol, Frontex, SELEC, ABŞ-ın Daxili Təhlükəsizlik Araşdırmaları Xidməti (HSI) və Alkoqol, Tütün, Odlu Silahlar və Partlayıcı Maddələr Bürosu (ATF) dəstək verib.