"Jaguar" sinfini dəyişir: yeni elektrik "Type 01" lüks avtomobil qiymətinə satılacaq

Britaniyanın "Jaguar" markası "Type 01" modelini təqdim edib.

"PostMedia"nın "Autocar" istinadən verdiyi məlumata görə, bu, markanın yeni dövrünün ilk avtomobili və böyük ölçüdə onun gələcəyinin asılı olduğu modeldir.

Elektrik GT üç mühərriklə təchiz olunub və ümumi gücü təxminən 1000 at qüvvəsidir. Model alüminium kuzova və olduqca qeyri-adi dizayna malikdir. Satışların 2027-ci ilin fevralında başlaması, ilkin qiymətin isə 120 min funt sterlinq olması planlaşdırılır.

Yeni GT-nin uzunluğu 5,2 metr, təkər bazası 3,2 metr, hündürlüyü isə cəmi təxminən 1,4 metrdir. Uzun kapot, geriyə çəkilmiş salon, alçaq dam və iri arxa dayaqlar avtomobili uzaqdan belə seçilən edir. "Jaguar"da bu dizaynı “heç nəyin surəti” adlandırırlar. Bu ifadədən markanın qurucusu Uilyam Lyons avtomobillərin orijinallığını təsvir etmək üçün istifadə edib.

Bununla yanaşı, dizaynerlər "Type 01"i mövcud modellərdən hər hansı birinə bənzətməyə şüurlu şəkildə çalışmayıblar. 2020-ci ildə Jaguar gələcək avtomobilin dizaynı üçün üç dizayner komandası arasında müsabiqə keçirib. Komandalar 18 tamölçülü maket hazırlayıblar. Ən cəsarətli variant qalib gəlib. Dizaynın hazırlanmasına rəhbərlik edən Endi Uil bildirib ki, bu proses zamanı “kompromis” sözü faktiki olaraq qadağan edilmişdi.

Xarici görünüş Type 01-in yeganə qeyri-adi xüsusiyyəti deyil. Avtomobilin arxa şüşəsi yoxdur. Görünüş tavan üzərində yerləşdirilmiş kamera vasitəsilə təmin olunur və görüntü salondakı ekranda əks etdirilir. Arxa fənərlər üfüqi radiator barmaqlığında gizlədilib, qapılar çərçivəsizdir, salon isə mərkəzi uzununa element vasitəsilə dörd zonaya bölünüb.

"Jaguar" avtomobil üçün öz elektrik arxitekturasını — JEA-nı hazırlayıb. Batareya ön və arxa hissələrə bölünüb. Bu, sərnişinləri daha aşağı yerləşdirməyə və avtomobilin alçaq siluetini qorumağa imkan verib. Batareyanın döşəmənin altında yerləşdirildiyi ənənəvi quruluşdan istifadə edilsəydi, avtomobil təxminən 20 santimetr daha hündür olardı.

"Type 01" üç elektrik mühərriki ilə təchiz olunub: biri öndə, ikisi isə arxada yerləşir. Onların ümumi maksimal gücü təxminən 1000 at qüvvəsidir. Magistralda sakit hərəkət zamanı avtomobil enerji sərfiyyatını azaltmaq üçün yalnız ön mühərrikdən istifadə edə bilər. Sürətlənmə zamanı arxa mühərriklər də işə düşür. Onların hər biri müstəqil fəaliyyət göstərir və bu, sistemə fırlanma momentini təkərlər arasında bölüşdürməyə imkan verir.

"Type 01" 0-dan 62 mil/saatadək, yəni təxminən 100 km/saatadək 3,2 saniyəyə sürətlənir. Daha təsirli göstərici isə cəmi 4 saniyəyə 62-dən 112 mil/saatadək, yəni təxminən 100–180 km/saatadək sürətlənmədir.