Belarus sanksiyaların yumşaldılmasından sonra ABŞ-yə ilk gübrə partiyasını göndərib

ABŞ sanksiyaların yumşaldılmasından sonra son dörd il ərzində ilk dəfə Belarus gübrələrinin partiyasını qəbul edəcək.

"PostMedia" xəbər verir ki, bu barədə "Financial Times" yazır.

"Argus" agentliyinin məlumatına görə, sentyabrın 15-də Sankt-Peterburq limanında Belarus şirkəti Marşall adaları bayrağı altında üzən gəmiyə 30 min ton qranul şəklində kalium xlorid yükləyib. "Kpler" məlumatlarına əsasən, yük oktyabrın 14-də Yeni Orlean limanına çatacaq.

Vaşinqton 2021-ci ildə Belarusun kalium sənayesinə qarşı məhdudiyyətlər tətbiq etmişdi. Bir neçə il sonra — 2025-ci ilin dekabrında — ABŞ Minsk tərəfindən siyasi məhbusların azad edilməsindən sonra sanksiyaları yumşaltmağa başladı. Bu ilin martında isə Vaşinqton "Belaruskali", "Belarusian Potash Company" və "Agrorozkvit" şirkətlərinə qarşı məhdudiyyətləri tamamilə aradan qaldırdı.

Argus-un məlumatına görə, sanksiyalardan əvvəlki dövrdə (2017–2021-ci illər) Belarus ABŞ-yə ildə orta hesabla 635 min ton kalium gübrəsi ixrac edirdi. Sentyabr ayında ABŞ Prezidenti Donald Tramp Vaşinqtonun Minsk ilə kalium gübrələrinin tədarükünə dair böyük həcmli müqavilə bağlamaq niyyətində olduğunu açıqlayıb. Tramp bildirib ki, qiymət ABŞ-nin hazırda Kanadaya ödədiyindən əhəmiyyətli dərəcədə aşağı olacaq və bunun amerikalı fermerlər və heyvandarlıq təsərrüfatları üçün müsbət nəticə verəcəyini qeyd edib.

Eyni zamanda, Belarus Prezidenti Aleksandr Lukaşenko ölkənin Qərb bazarlarına gübrə tədarük edə bilməyəcəyini iddia edib. Onun sözlərinə görə, istehsal olunan bütün həcm artıq ilin sonunadək qüvvədə olan müqavilələr üzrə bölüşdürülüb. Lukaşenko vurğulayıb ki, Belarus Qərb bazarlarına məhsul satmaq istəsə belə, bunun üçün kifayət qədər əlavə həcmi yoxdur, çünki bütün məhsul artıq müqavilələrlə bağlıdır.

Kalium gübrələri bitkilərin böyüməsini sürətləndirmək, məhsuldarlığı artırmaq və xəstəliklərə davamlılığı yüksəltmək məqsədilə torpağa verilən mineral maddələrdir. İranla bağlı ABŞ və İsrail müharibəsi nəticəsində Hörmüz boğazının bağlanması gübrələrin qlobal əlçatanlığının kəskin azalmasına səbəb olub.

"Belaruskali" dünyanın ən böyük kalium istehsalçılarından biridir və gübrələr Belarusun əsas ixrac məhsullarından biri olaraq qalır. ABŞ Maliyyə Nazirliyi onları "Lukaşenko rejiminin vergi gəlirlərinin və valyuta daxilolmalarının əsas mənbəyi" kimi qiymətləndirirdi.