EBRD “Veysəloğlu”na 126 milyon manat kredit ayırır

Avropa Yenidənqurma və İnkişaf Bankı (EBRD) Azərbaycanın aparıcı ərzaq pərakəndə satış və sürətli istehlak malları (FMCG) şirkətlərindən biri olan “Veysəloğlu” Şirkətlər Qrupuna 126 milyon manat (65 milyon avro ekvivalenti) həcmində uzunmüddətli kredit ayırmağı planlaşdırır.

"PostMedia"nın EBRD-dən əldə etdiyi məlumata görə, layihə çərçivəsində ayrılacaq vəsait şirkətin mağazalar şəbəkəsinin genişləndirilməsinə, nəqliyyat parkının yenilənməsi və böyüdülməsinə, eləcə də Azərbaycanda yeni paylama mərkəzinin tikintisinə sərf olunacaq.

Layihənin Avropa İttifaqının EFSD+ zəmanət sazişi çərçivəsində ilk itkilərin qarşılanmasını nəzərdə tutan risk təminatından faydalanması gözlənilir. Bu təminat “Bələdiyyə, İnfrastruktur və Sənaye Dayanıqlılığı üzrə Zəmanət Proqramı Plus” çərçivəsində təqdim edilir.

Layihənin əsas məqsədi “Veysəloğlu” Şirkətlər Qrupunun fəaliyyətinin genişləndirilməsi, müasir logistika infrastrukturunun inkişafı və pərakəndə satış şəbəkəsinin böyüdülməsidir. Uzunmüddətli maliyyələşmə şirkətin mövcud təchizat zəncirindəki və logistika infrastrukturundakı potensial məhdudiyyətlərin aradan qaldırılmasına kömək edəcək.

Layihənin ümumi dəyəri 373 milyon manat təşkil edir. EBRD-nin maliyyələşdirməsi isə digər kreditorların da iştirak etdiyi daha geniş maliyyə paketinin bir hissəsidir.

Layihə EBRD-nin 2024-cü il Ekoloji və Sosial Siyasətinə əsasən B kateqoriyasına aid edilib. Bankın qiymətləndirməsinə görə, yeni mağazaların, paylama mərkəzinin yaradılması və elektrik nəqliyyat vasitələrinin satın alınması ilə bağlı ekoloji və sosial risklər müvafiq idarəetmə tədbirləri və qabaqcıl sənaye təcrübələri vasitəsilə nəzarətdə saxlanıla bilər.

Qaradağ rayonunda inşa edilməsi nəzərdə tutulan yeni paylama mərkəzinin layihələndirilməsi ilkin mərhələdədir. Tikintiyə başlamazdan əvvəl şirkət ətraf mühit və sosial təsirlərin qiymətləndirilməsini aparmalı, tikinti və istismar mərhələləri üzrə müvafiq idarəetmə planları hazırlamalıdır.

Layihə Paris Sazişinin iqlim dəyişikliyinin azaldılması və ona uyğunlaşma məqsədlərinə uyğun hesab edilib. Ümumilikdə, layihə investisiyalarının 61%-i yaşıl maliyyələşmə kimi qiymətləndirilib.

Qeyd edək ki, 1994-cü ildə təsis edilən “Veysəloğlu” Şirkətlər Qrupu Azərbaycanda distribusiya, pərakəndə satış, logistika və istehsal sahələrində fəaliyyət göstərir. Qrupun Baş icraçı direktoru Aydın Veysəloğludur.