"Tesla" "Solar Roof" günəş kirəmitlərindən imtina edir

"Tesla" evlərin damına quraşdırılan "Solar Roof" günəş kirəmitlərindən imtina edir.

"PostMedia" "Electrek"ə istinadən xəbər verir ki, şirkət məhsulu dayandırır və üçüncü tərəf quraşdırıcı şəbəkəsinə bundan sonra yalnız adi günəş panelləri tədarük olunacaq.

"Tesla"nın tesla.com/solarroof səhifəsi artıq adi günəş panellərinə yönləndirilir, məhsul saytın "Energy" menyusunda da görünmür. "Solar Roof" üçün qiymət hesablayan onlayn konfiqurator da indi adi panellərə aparır. Bəzi quraşdırıcılar isə layihənin vaxtından asılı olaraq "Solar Roof"u hələ də təklif edir.

"Solar Roof" adi dam kirəmitinə bənzəyəcək şəkildə hazırlanmışdı və adi günəş panelinin səmərəliliyinin 98 faizini təmin edirdi. Kirəmitlər işığı əks etdirərək küçədən adi kirəmit kimi görünür, yuxarıdan baxanda isə şəffaf olur.

Məhsulun kütləvi istehsalı 2020-ci ildə başlayıb. 2021-ci ildə birinci rüb üzrə hesabat konfransında "Tesla"nın rəhbəri İlon Mask layihədə "əhəmiyyətli səhvlərə" yol verildiyini, bunun həddindən artıq xərclərə və ciddi gecikmələrə səbəb olduğunu etiraf edib.

Təqdimat mərasimindən az sonra "Tesla" ABŞ-nin o vaxtkı ən böyük günəş enerjisi təchizatçısı olan, Maskın əmioğlularının qurduğu SolarCity şirkətini 2,6 milyard dollara alıb. Sonradan bu alışla bağlı səhmdarların məhkəmə iddiası zamanı təqdimatda göstərilən kirəmitlərin işlək olmadığı üzə çıxıb.

Məhsulun uğursuzluğunun əsas səbəbləri yüksək qiymət və satış hədəflərinin yerinə yetirilməməsi olub. 2021-ci ildə 3947 kvadrat fut sahəli dam və 12,3 kVt gücündə sistem üzrə hesablamada qiymət bir il ərzində güzəştlərdən əvvəl 54 966 dollardan 79 938–100 621 dollara qədər artıb. "Tesla" məhsulun estetik dəyərinə ümid bağlayanda isə adi günəş panelləri səmərəli modullar və kütləvi istehsal hesabına hər il ucuzlaşırdı.

Wood Mackenzie-nin məlumatına görə, 2022-ci ildə, ən yüksək göstərici dövründə "Tesla" həftədə cəmi 21–32 "Solar Roof" quraşdırıb. Maskın hədəfi isə həftədə 1000 quraşdırma idi. Bir il sonra hazırlanmış hesabatda ABŞ-də bu məhsulun yalnız 3 minə yaxın evdə quraşdırıldığı bildirilib.

İstifadəçilər damların nəzərdə tutulandan az elektrik istehsal etdiyini, bəzi hallarda isə damaltı təbəqənin əridiyini bildirib. "Merlin Solar" kimi rəqiblərin elastik panelləri isə hələ də satılır, yəni inteqrasiya olunmuş günəş panelləri tam yoxa çıxmayıb.

Foto: Engadget