Tramp Rusiya və Çinlə nüvə tərksilahı üzrə danışıqlar aparıldığını açıqlayıb

ABŞ Rusiya və Çinlə nüvə tərksilahı məsələlərini müzakirə edir.

"PostMedia" xəbər verir ki, ABŞ Prezidenti Donald Tramp “Newsmax” telekanalına eksklüziv müsahibəsində belə deyib. O, hər üç ölkənin nüvə arsenalını azaltmağa nail olacağına ümid etdiyini bildirib.

“Əgər bu mümkündürsə, nüvə silahlarından imtina etməyə nail olmaq istərdim. Biz bu məsələni həqiqətən də Rusiya və Çinlə müzakirə edirik”, – Tramp bildirib.

Tramp iddia edib ki, dünyada ən böyük nüvə arsenalı ABŞ-yə məxsusdur, Rusiya ikinci, Çin isə üçüncü yerdədir. Onun proqnozuna görə, Çin beş-altı il ərzində bu göstərici üzrə ABŞ-yə çata bilər.

“Çin, yəqin ki, buna daha az meyillidir, çünki bu sahədə bizdən xeyli geri qalır. Biz birinci yerdəyik, Rusiya ikinci. Çin isə beş-altı ildən sonra bizə çatacaq”, – ABŞ Prezidenti deyib.

“Buna görə də onlar bu məsələyə daha az meyillidirlər. Amma bəli, biz bunu müzakirə edirik. Bu barədə kifayət qədər çox danışırıq”, – Tramp əlavə edib.

Bununla belə, o, nüvə tərksilahı üzrə mümkün danışıqların vaxtı barədə məlumat verməyib və Moskva, yaxud Pekinlə hər hansı razılaşmanın əldə olunduğunu açıqlamayıb.

May ayında Tramp nüvə tərksilahı məsələsini Çin Xalq Respublikasının sədri Si Cinpinlə müzakirə etdiyini bildirmişdi. Həmin vaxt ABŞ Prezidenti Rusiyanın da nüvə silahlarının azaldılması səylərində iştirak etməli olduğunu vurğulamışdı.