Tramp Netanyahu haqqında: “Mən heç kimə etibar etmirəm”

ABŞ Prezidenti Donald Tramp bildirib ki, İsrail rəsmiləri onun İsrailin Baş naziri Benyamin Netanyahunun seçki kampaniyasına qoşulmasını istərdilər, lakin o, dəstək verəcəyinə söz verməyib. Eyni zamanda, ABŞ lideri siyasətdə heç kimə, o cümlədən İsrail hökumətinin başçısına etibar etmədiyini etiraf edib.

"PostMedia" xəbər verir ki, Trampa “Newsmax” telekanalına verdiyi eksklüziv müsahibə zamanı oktyabrın 27-də İsraildə keçiriləcək parlament seçkilərinə müdaxilə etmək niyyətində olub-olmadığı barədə sual verilib. Netanyahu həmin seçkilərdə yenidən baş nazir postunu tutmağa ümid edir.

“Onlar mənim bunu etməyimi istərdilər. Bəli, istərdilər”, – Tramp cavab verib.

“Dinləyin, bizim onunla çox yaxşı münasibətlərimiz var. Birlikdə yaxşı nəticələr əldə etmişik”, – ABŞ Prezidenti əlavə edib.

Aparıcı Trampdan birbaşa Netanyahuna etibar edib-etmədiyini soruşduqda o, belə cavab verib: “Düzünü desəm, mən heç kimə etibar etmirəm”.

“Mən heç kimə etibar etmirəm. Siyasət dünyasında heç kimə etibar etmirəm”, – ABŞ lideri fikrini təkrarlayıb.

ABŞ Prezidenti İrana qarşı müharibə zamanı iki ölkənin əməkdaşlığını yüksək qiymətləndirib. Onun sözlərinə görə, ABŞ və İsrailin birgə hərbi əməliyyatları Tehranın hərbi imkanlarına və ölkə rəhbərliyinə ciddi zərər vurub.

“Biz, xüsusilə hərbi sahədə, çox uğurlu tərəfdaşlıq qurmuşuq”, – Tramp bildirib.

O, İsrail seçiciləri arasında populyarlığı ilə də öyünüb.

“Deyirlər ki, əgər mən baş nazirliyə namizədliyimi irəli sürsəydim, İsraildə səslərin 99 faizini qazanardım”, – ABŞ Prezidenti deyib.

Bu arada, Netanyahunun rəhbərlik etdiyi “Likud” partiyası gərgin seçki mübarizəsinə hazırlaşır. Son sorğulara görə, hazırkı baş nazirin rəhbərlik etdiyi siyasi blok 120 deputatdan ibarət Knessetdə hökumət qurmaq üçün zəruri olan 61 mandatlıq çoxluğu əldə edə bilmir.

Sentyabrın 24-də İsrailin “Zman Yisrael” nəşrində dərc olunan sorğunun nəticələrinə əsasən, Netanyahunun tərəfdarları və əleyhdarları hərəyə 53 mandat qazana bilər. Qalan 14 mandatın isə ərəb əhalisini təmsil edən partiyalara çatacağı ehtimal olunur.