Bob Dilan Vatikanda Papa XIV Leo ilə görüşüb, ona kitabını hədiyyə edib

Ədəbiyyat üzrə Nobel mükafatı laureatı, 85 yaşlı amerikalı müğənni Bob Dilan Vatikanda Roma Papası XIV Leo ilə görüşüb.

"PostMedia" xəbər verir ki, görüşü sosial şəbəkədə Dilanı müşayiət edən keşiş Antonio Spadaro təsvir edib. O, müğənniyə "L'Osservatore Romano" qəzetinin redaktoru Andrea Monda ilə birlikdə yoldaşlıq edib.

"Bu gün Bob Dilanı Papa Leonun görüşünə müşayiət etdim. Tarixin ləzzətini daşıyan bu görüşü yaşamağın həyəcanı ilə və Apostol Sarayında hər addımda istənilən şeyin baş verə biləcəyi hissi ilə", — deyə Spadaro yazıb. O, müğənninin Papanın yanında çəkilmiş iki fotosunu da paylaşıb.

Dilan qəbulda qara sviterdə və başına kapüşon çəkilmiş halda görünüb. Müğənni Romada qastrol turunun bir dayanacağında olur, cümə axşamı axşam isə Palazzo dello Sport salonunda səhnəyə çıxacaq.

Qəbul qısa olub, tərəflər salamlaşıb və bir neçə kəlmə danışıblar. XIV Leo müğənniyə təsbeh bağışlayıb, Dilan isə cavabında "Chronicles - Volume 1" avtobioqrafik kitabının nüsxəsini təqdim edib.

Bu görüş birdən-birə yaranmayıb. Keçən iyulda Papa Vatikan nəşriyyatı "Libreria Editrice Vaticana"nın çap etdiyi, jurnalist Alessandro Banfinin redaktəsi ilə hazırlanmış "Disarmata e disarmante. La pace è un dono" kitabının ön sözündə Dilana istinad edib.

Papa Dilanın 1963-cü ildə Soyuq müharibənin ən gərgin dövründə yazdığı "Go Away You Bomb" etiraz mahnısından sətirlər seçib: "Səndən nifrət edirəm, çünki səni insan yaradıb, insan sənə sahibdir və səni insan idarə edir". Nüvə təhlükəsinə qarşı yazılmış bu mahnı heç vaxt səsyazmaya alınmayıb və Dilanın albomlarında rəsmi şəkildə buraxılmayıb. Əlyazmanın əsli yalnız 2013-cü ildə tapılıb. XIV Leo bu sətirlərdən yenidən silahlanma və yeni nüvə eskalasiyası riskinə qarşı xəbərdarlıq üçün istifadə edib.

Dilan 1960-cı illərdə "Masters of War" və "Blowin' in the Wind" kimi mahnılarla məşhurlaşıb, bu mahnılar müharibə əleyhinə etirazlar və vətəndaş hüquqları uğrunda mübarizə ilə assosiasiya olunur. Lakin onun mövqeyi mütləq pasifistin mövqeyindən daha mürəkkəbdir: 2001-ci ildə o, özünü pasifist saymadığını deyib və özünümüdafiə hüququnu müdafiə edib.

Dilan Papanın qarşısında ilk dəfə görünmür. 1997-ci ildə o, Boloniyada Milli Evxaristiya Konqresində II İohann Pavelin və təxminən 300 min gəncin qarşısında çıxış edib. Üç mahnı, o cümlədən "Knockin' on Heaven's Door" ifa etdikdən sonra kovboy papağını çıxarıb, Papa səhnəsinin pilləkənlərini qalxıb və Karol Voytılanın əlini sıxıb.

Çıxışında II İohann Pavel "Blowin' in the Wind" mahnısına istinad edib: "Sən soruşursan: insana insan deyilməzdən əvvəl o, neçə yol getməlidir?". Papa özünün cavabını da verib: "Yalnız bir. İnsan üçün yalnız bir yol var, o da İsa Məsihin yoludur".

Mənəviyyat Dilanın yaradıcılığının mühüm istiqamətlərindən biridir. Yəhudi ailəsində böyüyən müğənni 1970-ci illərin sonunda dərin dini dönüş yaşayıb və xristianlığa yaxınlaşıb. 1979-cu ildə "Slow Train Coming" albomunu, ardınca isə "Saved" və "Shot of Love" albomlarını buraxıb. Bu üç albomda xristian inancı və qospel dili açıq şəkildə yer alıb. Sonrakı illərdə daha rəngarəng repertuara qayıdıb, amma dini istinadlardan əl çəkməyib. Yaxın vaxtlarda verdiyi müsahibələrin birində Dilan özünü dindar adam adlandırıb, Müqəddəs Kitabı tez-tez oxuduğunu, meditasiya etdiyini və dua etdiyini bildirib.

XIV Leo üçün də musiqi duanın müşayiətindən daha çox şey ifadə edir. Papalığının ilk ilində o, musiqinin ünsiyyət və mənəvi gücünü dəfələrlə vurğulayıb: onun "Regina Caeli" və "Pater Noster" duasını latınca oxuduğunu eşitmək, səfərləri zamanı görüşdüyü icmaların mahnılarına dərin maraqla qulaq asdığını görmək mümkün olub. 2025-ci ilin noyabrında xorlar və xor qrupları üçün keçirilən yubiley mərasimində Papa musiqini böyük sivilizasiyaların bəxş etdiyi və ürəyimizin dərinliyində daşıdığımızı ifadə edə bilən hədiyyə adlandırıb. Onun sözlərinə görə, oxumaq zehni, hissləri, bədəni və ruhu birləşdirir. Müqəddəs Avqustinə istinadən o xatırladıb: "Cantare amantis est", yəni "oxumaq sevənin xüsusiyyətidir".