"Apple" tanışlıq və süni intellekt yoldaşı tətbiqlərini 18+ ilə məhdudlaşdırır

"Apple" "App Store" qaydalarında dəyişiklik edərək tanışlıq tətbiqlərini və "cinsi və ya romantik məzmun" təqdim edən süni intellekt yoldaşı tətbiqlərini yalnız 18 yaşdan yuxarı istifadəçilər üçün əlçatan edəcək.

"PostMedia" xəbər verir ki, şirkət bu qərarı bazar ertəsi tərtibatçılara göndərdiyi bildirişdə açıqlayıb.

Yeni siyasətə görə, tanışlıq və ya romantik münasibət funksiyaları təklif edən bütün tətbiqlər 18+ reytinqinə malik olmalıdır. Noyabrın 16-dan etibarən tərtibatçılar tətbiqin yaş reytinqinin funksiyalarına uyğun olması üçün yeni məzmun təsvirləri əlavə etməlidirlər.

Əksər iri tanışlıq xidmətləri platformalarını adətən yalnız yetkinlər üçün nəzərdə tutur. Qərarın süni intellekt yoldaşı tətbiqlərinə, yaxud belə funksiyanın bir neçə imkandan biri olduğu tətbiqlərə təsiri isə daha maraqlı görünür.

Çox vaxt gənclərə yönəldilən "Character.AI", "Replika" və digər süni intellekt tətbiqləri istifadəçilərə dost, sevgili və digər xəyali personajlar yaratmağa imkan verir. "xAI" ötən il 3D animasiyalı süni intellekt yoldaşları təqdim edib, istifadəçilər isə yetkinlər üçün nəzərdə tutulmuş (NSFW) imkanları aktivləşdirə bilirdilər. Ötən yayın məlumatına görə, "App Store" və "Google Play"də ən məşhur süni intellekt yoldaşı tətbiqləri dünya üzrə 220 milyon dəfə yüklənib.

"Tanışlıq və münasibətlər" kateqoriyasından əlavə, tətbiqlər istifadəçinin real məkanını başqa şəxs və ya qrupla paylaşıb-paylaşmadığını da göstərməlidir. Belə funksiya, xüsusilə istifadəçi məkanının paylaşıldığından xəbərsizdirsə, məxfilik baxımından ciddi suallar doğurur.

Şirkət qeyd edib ki, Braziliyada ailələr üçün məkan paylaşma funksiyası təklif edən tətbiqlər yerli qanunun tələb etdiyi A16 reytinqi ilə qeydə alınmaq əvəzinə, Braziliya Ədliyyə və İctimai Təhlükəsizlik Nazirliyindən (MJSP) rəsmi reytinq tələb edə bilər.

Yeni qaydalar "Apple"ın azyaşlıların qorunması üçün atdığı digər addımların davamıdır. Bunlara yaşı təsdiqləyən texnologiyanın qlobal tətbiqi, valideyn nəzarəti və uşaq təhlükəsizliyi funksiyalarının genişləndirilməsi daxildir.