Conni Depp "Karib dənizinin quldurları" filmimə qayıtmasının şərtini açıqlayıb

Aktyor Conni Depp "Pirates of the Caribbean 6" filmində Cek Sparrou rolunda geri dönmə ehtimalı barədə danışıb, lakin bunu təsdiqləməyib.

"PostMedia" xəbər verir ki, Depp bu sözləri "Ebenezer" filminin təqdimat turu zamanı "Entertainment Tonight"a müsahibəsində deyib.

Oskar mükafatına namizəd olmuş aktyor quldur kostyumunu yenidən geyinəcəyini demək istəməyib. Amma dostu və franşizanın prodüseri Cerri Brukhaymerin istənilən təklifini rədd etməyəcəyini bildirib.

"Əgər franşizanı başa vurmaq üçün hər şey lazım olan səviyyədədirsə, həqiqətən istədiyim yeganə iştirak tamaşaçıları daha yaxşı notada yola salmaqdır", — deyə Depp söyləyib. "Sabah Brukhaymerlə istənilən layihədə işləməyə gedərəm. Fərq etmir. Söhbət Cerridən gedirsə, ona etibar edirəm. Aramızda dərin dostluq var".

Brukhaymer 2025-ci ilin yayında "Entertainment Weekly"yə yeni "Pirates" filmi barədə Depplə danışdığını təsdiqləmişdi. Prodüser o vaxt Cek Sparrounun qayıdacağına nikbin yanaşdığını demişdi: "Əgər rolun necə yazıldığı xoşuna gəlsə, məncə, razılaşar. Hər şey ssenaridən asılıdır. Hələ ssenari üzərində işləyirik. Bu filmi çəkmək istəyirik, sadəcə düzgün ssenari lazımdır. Hələ tam alınmayıb, amma yaxınlaşmışıq".

Depp 2003-2017-ci illər arasında franşizanın beş filminin baş qəhrəmanı olub. Bu filmlərin hər biri dünya kassasında 650 milyon dollardan çox gəlir gətirib. 2006-cı ildə çıxan "Dead Man's Chest" və 2011-ci ildəki "On Stranger Tides" isə 1 milyard dollar həddini keçib. Depplə çəkilən filmlər birlikdə 4,5 milyard dollar qazanıb.

Aktyorun franşizadakı gələcəyi hüquqi problemlərindən və 2022-ci ildə keçirilən keçmiş həyat yoldaşı Ember Hördlə məhkəmə prosesindən sonra sual altında qalmışdı. Depp bu ay Hollivuda "Paramount"un dəstəklədiyi "Ebenezer" bayram filmi ilə qayıdır.

Altıncı filmə gedən yol uzun olub. 2020-ci ilin yayında "Variety" Disney-nin iki "Pirates" layihəsi üzərində işə başladığını yazmışdı: Marqo Robbinin başçılıq edəcəyi yenidən başlama ("reboot") və orijinal franşizanın altıncı filmi. Robbi 2022-ci ilin noyabrında "Vanity Fair"ə bildirib ki, Disney qadın qəhrəmanlı layihə ilə maraqlanmır.

Brukhaymer 2024-cü ilin yayında bu filmin ssenarisi üzərində işləməyə 2017-ci ildəki "Dead Men Tell No Tales"in ssenaristi Cef Natansonun qoşulduğunu açıqlamışdı. "O, bu işin öhdəsindən gəlib. Çox gözəl üçüncü hissəsi var. Sadəcə birinci və ikinci hissəni səliqəyə salmalıyıq", — deyə prodüser bildirmişdi.

Brukhaymer həmin vaxt Deppin geri qayıtmasına açıq olduğunu da demişdi: "Bu, yenidən başlama filmidir, amma mənim qərarımla olsaydı, Conni orada olardı. Onu sevirəm, yaxşı dostumdur. O, heyrətamiz sənətkardır. Kapitan Ceki o yaratdı".

Deppin Hollivud studiyası ilə çəkdiyi son film 2018-ci ildəki "Fantastic Beasts: The Crimes of Grindelwald" olub. İndi onun iki yeni layihəsi var: "Ebenezer" və "Lionsgate"in 2028-ci ildə nəzərdə tutduğu "Day Drinker" triller filmi.

Depp 2020-ci ildə britaniyalı "The Sun" qəzetinə qarşı iddianı uduzandan sonra "Warner Bros." ondan "Fantastic Beasts" seriyasının növbəti filmindən çıxmasını xahiş edib. Aktyor qəzetin onu "arvadını döyən" adlandırmasına görə məhkəməyə müraciət etmişdi, məhkəm isə bu ifadənin "əsasən doğru" olduğunu bildirmişdi. Deppin rolunu sonradan Mads Mikkelsen oynayıb.

2022-ci ildə ABŞ-də keçirilən ikinci məhkəmədə Depp keçmiş həyat yoldaşı Ember Hörddən "The Washington Post"da dərc etdirdiyi məqaləyə görə böhtan iddiası ilə çıxış edib. Münsiflər heyəti Hördün Deppə böhtan atdığını müəyyən edib, eyni zamanda Deppin də ona qarşı böhtan yaydığı qənaətinə gəlib.