Google məktəblərə süni intellekti söndürməyə imkan verəcək, amma axtarış da bağlanacaq

"Google" gələn ildən K-12 (1-ci sinifdən 12-ci sinfədək təhsil pilləsi) şagirdləri üçün süni intellekt alətlərini, məktəb rəhbərliyi onları açıq şəkildə aktivləşdirmədikcə, söndürəcək.

"PostMedia" "Google"un bloq yazısına istinadən xəbər verir ki, qərar məktəblər, müəllimlər, aparıcı tədqiqatçılar və siyasətçilərlə məsləhətləşmələrdən sonra qəbul edilib. Dəyişiklik "Gemini", "NotebookLM", "Gemini in Classroom" və "Google Search" xidmətlərinə aid olacaq.

Süni intellektdən tamamilə imtina etmək istəyən məktəblər "Google Search" axtarış sisteminə də çıxışı itirəcək. Səbəb odur ki, süni intellekt funksiyaları artıq axtarış mühərrikinə inteqrasiya olunub.

"Google"un təhsil üzrə vitse-prezidenti Kris Fillips bildirib ki, məktəb süni intellekti tamamilə məhdudlaşdırmaq qərarına gəlsə, şagirdlər axtarışa çıxış əldə edə bilməyəcək. Onun sözlərinə görə, şagirdlər bunun əvəzinə məktəbdən axtarışın əlçatmaz olduğunu bildirən mesaj görəcəklər.

"Axtarış və süni intellekt dərindən inteqrasiya olunub", — deyə Fillips bildirib.

Müəllimlər şagirdlərin araşdırma aparmaq və ya tapşırıq yerinə yetirmək üçün "Google Search"dəki "AI Overviews" funksiyasından istifadə etməsini istəməyə bilər. Eyni zamanda onlar şagirdlərin mənbə və digər tədris materialları tapmaq üçün axtarış sisteminə çıxışını saxlamaq istəyə bilər. Lakin axtarış və onun süni intellekt funksiyaları artıq bir-birindən ayrılmır, ona görə də axtarışdan istifadəni davam etdirmək istəyən məktəblər süni intellekt funksiyalarını da qəbul etməli olacaq.

"Google" tətbiqlərinin siniflərdə geniş istifadəsi və "Chromebook" kompüterlərinin yayılması fonunda qərar şirkətin təhsil sektoruna təsirini bir daha göstərir.

Fillips bloq yazısında qeyd edib ki, dəyişikliklər tətbiq olunmazdan əvvəl məktəblərə növbəti aylarda daha ətraflı məlumat veriləcək ki, onlar hazırlaşıb keçidi rahat həyata keçirə bilsinlər.

"Məqsədimiz sadədir: məktəb rəhbərlərinə süni intellekt məhsullarından sinifdə özlərinin məqsədəuyğun hesab etdiyi kimi istifadə etmək üçün nəzarət və əminlik verməkdir", — deyə o yazıb.

"Google" bu dəyişikliyi məktəblərdə "Guided Learning" alətinin istifadəyə verilməsi ilə eyni vaxtda açıqlayıb. Alət bu ilin əvvəlində təqdim edilib və süni intellekt müəllimi kimi işləyir: istifadəçilərə yalnız cavab verməkdən çox, mövzunu dərindən anlamağa kömək etmək üçün hazırlanıb.

Bu addım süni intellekt çatbotlarının birbaşa cavab verməklə öyrənmə prosesinə zərər vurduğuna dair narahatlıqların fonunda atılıb.