Cimmi Kimmel Trampa: "Sən bülletendə idin, it tükü kimi hər şeyin üstündəsən"

Amerikalı teleaparıcı Cimmi Kimmel ABŞ Prezidenti Donald Trampı aralıq seçkilərdəki uğursuzluğu "bülletendə olmamaq" ilə izah etdiyinə görə sərt tənqid edib.

"PostMedia" "The Hollywood Reporter"ə istinadən xəbər verir ki, aparıcı bu sözləri "Jimmy Kimmel Live!" verilişinin çərşənbə günü axşam efirində səsləndirib. 2026-cı il aralıq seçkilərində Demokratlar ölkə üzrə mühüm qələbələr qazanıb.

Kimmel Trampın "Mən bülletendə deyildim, olsaydım, böyük fərqlə qalib gələrdik!" bəyanatını xüsusi hədəf alıb.

"Sus. Sadəcə sus. Xahiş edirəm. Bircə gün bizə rahatlıq ver və bu gülünc ağzını bağla. Sən çox ərköyün uşaqsan. Heç nə öyrənmisən? Nəzakət, idman əxlaqı, sadə insanlıq haqqında? Heç vaxt heç nədə sənin günahın yoxdur!" — deyə Kimmel bildirib.

Aparıcı əlavə edib ki, Tramp bülletendə idi: "Sən it tükü kimisən, hər şeyin üstündəsən. Həyatımızın hər küncünə yoluxmusan".

"The Washington Post"un araşdırmasına görə, Tramp seçki günündən əvvəl bu və ya ona yaxın sözləri, yəni bülletendə olduğunu ən azı 63 dəfə deyib. O, seçicilərə bəzən onun bülletendə olduğunu təsəvvür etməyi də tövsiyə edib.

Kimmel bildirib ki, Trampın özünün dəstəklədiyi namizədlərin çoxu uduzub. O, Ken Pakstonun, Tom Tillisin, Vivek Ramasvaminin adlarını çəkib. Kimmelin sözlərinə görə, Tramp Ceyd Di Vensi vitse-prezident seçməsəydi, Respublikaçılar Ohayoda itirdikləri Senat yerini saxlayardılar.

Aparıcı Trampın "The New York Times"a seçki nəticələrini qəbul edəcəyini deməsini də ələ salıb. "Bu nə xəbərdir? Nəticələri qəbul edəcəksən? Çox sağ ol. Nəticələri qəbul etmək və ya rədd etmək sənin işin deyil, onlar sadəcə nəticədir. Təsəvvür edin: "Spurs" NBA finalında "Knicks"ə məğlubiyyəti qəbul edəcəyini bildirib. Xeyr! Qəbul etməli deyillər! Bu hesabdır!" — deyə Kimmel bildirib.

O, daha sonra Trampa istefa verməyi tövsiyə edib. "Artıq get. Sadəcə istefa ver. Səni heç kim istəmir. Hətta sən özün də artıq prezident olmaq istəmirsən. Milyard dollarlıq kriptovalyutanı götür, ada al, bəlkə Ceffri Epstinin adasını!" — deyə aparıcı bildirib.

Kimmel Vensin prezident olmasından da çox narahat olmadığını göstərib. "Donald Tramp Amerikanın Hitleridir" deyən adamın "Tramp mənim nəslimin ən böyük prezidentidir" mövqeyinə keçdiyini xatırladıb: "O, yenə geri dönə bilər. Onurğası olmayanda bu asandır".

NBC-nin "Late Night" verilişinin aparıcısı Set Mayers də Trampın bu mövqe dəyişikliyinə münasibət bildirib. O, Trampın aralıq seçkilərə qədər bülletendə olduğunu dəfələrlə təkrarladığı çıxışlardan montaj nümayiş etdirib.

"Bunu sənə deyən olmaq istəmirdim, amma bülletendə sən idin, dostum", — deyə Mayers bildirib. O, əlavə edib ki, adı bülletendə olmaya bilərdi, amma heç kim kimin prezident olduğunu unutmayıb. Mayersin sözlərinə görə, Tramp seçkilərdən əvvəlki ayda 30-a yaxın mitinq keçirib və hər şeyi özü ilə bağlayıb.