Ukraynaya səfər edən Almaniya kansleri Kiyevdən Putinə müraciət edib

Almaniyanın kansleri Fridrix Merz Rusiyanın Prezidenti Vladimir Putini Ukraynaya qarşı müharibəni dayandırmağa və danışıqlara hazır olduğunu nümayiş etdirməyə çağırıb.

"PostMedia" "dpa"ya istinadən xəbər verir ki, o, bu çağırışı bazar günü Kiyevə səfəri zamanı edib.

“Cənab Putin, bu mənasız müharibəni dayandırın! Biz danışıqlara hazırıq, bu müharibənin başa çatması barədə bir-birimizlə danışmağa hazırıq. Lakin Ukraynanın dinc əhalisinə qarşı bu barbar hücumlar dayandırılmalıdır”, – Merz bildirib.

Kansler Ukrayna Prezidenti Vladimir Zelenski ilə birlikdə pilotsuz uçuş aparatının hücumuna məruz qalmış Ukrayna Milli Elmlər Akademiyasını ziyarət edib. Merzin Kiyevə səfəri zamanı şəhərdə bir neçə dəfə hava hücumu siqnalı verilib. Bazar günü daha əvvəl Ukrayna paytaxtının şimalında yerləşən körpüyə zərbə endirilib.

Elmlər Akademiyasının dağıdılmış binasının qarşısında çıxış edən Merz bu cür hücumların, onun fikrincə, müharibənin mənasız olduğunu göstərdiyini bildirib. O qeyd edib ki, Akademiyaya zərbə Kiyevin mərkəzində, Almaniya səfirliyindən cəmi bir neçə yüz metr məsafədə baş verib.

“Bu gün səhər, sakit bir bazar günü Kiyevdə yenidən hava hücumu siqnalı verildi. Bunlar burada hər gün törədilən hərbi cinayətlərdir”, – kansler deyib.

Merz bildirib ki, Rusiya Ukraynanın qışa hazırlaşdığı bir vaxtda ölkənin infrastrukturuna hər gün zərbələr endirməyə davam edir.

“Biz danışa bilərik, amma yalnız silahlar susduğu zaman – və silahlar susmalıdır”, – kansler deyərək Rusiya rəhbərliyini müharibəni dayandırmağa bir daha çağırıb.

Pilotsuz uçuş aparatı gündüz saatlarında Ukrayna Milli Elmlər Akademiyasının binasına zərbə endirib. Hücum və ardınca baş verən yanğın nəticəsində tarixi binanın iki mərtəbəsi dağılıb. Bir qadın həlak olub, təxminən altı nəfər yaralanıb.