Amerikanın "Talon Blue" pilotsuz döyüş təyyarəsi ilk uçuşunu həyata keçirib

"Northrop Grumman" şirkətinin YFQ-48A "Talon Blue" pilotsuz döyüş təyyarəsi tam avtonom rejimdə ilk uçuşunu həyata keçirib.

"PostMedia" xəbər verir ki, uçuş yerüstü hərəkət, havaya qalxma, havada manevr və eniş mərhələlərini əhatə edib.

"Talon Blue" modul konstruksiyanı və qabaqcıl istehsal üsullarını birləşdirir. Bu yanaşma döyüş imkanlarına xələl gətirmədən təyyarələrin istehsal xərclərini azaltmağa və istehsalı sürətləndirməyə imkan verir. Bu uçuş "Northrop Grumman" şirkətinin avtonom sistemlər sahəsində 70 illik təcrübəsinin və 500 mindən çox avtonom uçuş saatının nəticəsidir.

"Talon Blue" "Northrop Grumman"ın öz vəsaiti hesabına maliyyələşdirdiyi "Talon" layihəsinin bir hissəsidir. Layihənin məqsədi istifadəyə hazır avtonom aviasiya sistemlərinin hazırlanmasını sürətləndirməkdir. Bu barədə "Naked Science" məlumat yayıb.

Konstruksiya və istehsal sahəsində tətbiq edilən yeniliklər detalların sayını və təyyarənin ümumi kütləsini azaltmağa, onun maya dəyərini aşağı salmağa və avtonom sistemlərə artan tələbatı qarşılamaq üçün istehsalı sürətləndirməyə imkan verib.

"Talon Blue"nun konstruksiyası müxtəlif döyüş tətbiqi variantlarını nəzərdə tutur. Yuxarı hissədə yerləşən havaqəbuledici, geniş şassi bazası və daxili silah bölməsi təyyarənin müxtəlif tapşırıqların yerinə yetirilməsinə uyğunlaşdırılmasına imkan verir. Bu imkanların ABŞ və onun müttəfiqlərinin maraqları naminə istifadə edilməsi nəzərdə tutulur.

"Talon Blue" artıq fəal şəkildə inkişaf edən pilotsuz aviasiya bazarına daxil olur. Bu bazarda rəqabət olduqca yüksəkdir. Təyyarələrin ilk növbədə ABŞ Hərbi Hava Qüvvələrinin satınalmalarının növbəti mərhələsində iştirak etməsi nəzərdə tutulur. "Increment 2" kimi tanınan bu proqram çərçivəsində yüzlərlə pilotsuz uçuş aparatının alınması planlaşdırılır.

Bununla yanaşı, bu mərhələdə təyyarələrə qoyulacaq konkret tələblər hələ tam müəyyənləşdirilməyib.