Ermənistan XİN-i 8 avqust Bəyannaməsi ilə bağlı bəyanat yayıb

Bir il əvvəl Prezident Tramp "Ağ Ev"də Ermənistanın Baş naziri Nikol Paşinyanı və Azərbaycanın Prezidenti İlham Əliyevi qəbul etmiş, onların iştirakı ilə tarixi sammit keçirilmişdi. Sammit zamanı Baş nazir Paşinyan və Prezident Əliyev Sülh üzrə Birgə Bəyannamə imzalamışdılar. Üç liderin iştirakı ilə Ermənistan və Azərbaycanın xarici işlər nazirləri “Ermənistan Respublikası ilə Azərbaycan Respublikası arasında sülhün və dövlətlərarası münasibətlərin təsis edilməsi haqqında” saziş layihəsini ilkin olaraq imzalamışdılar.

"PostMedia" xəbər verir ki, bu barədə Ermənistan Xarici İşlər Nazirliyinin yaydığı bəyanatda bildirilir.

“Bu ilk ildönümü münasibətilə ölkələrimizin birlikdə əldə etdiyi nailiyyətlərlə bağlı dərin qürur hissi keçirir və onilliklər davam edən münaqişəyə son qoyan, Cənubi Qafqazı daha firavan gələcəyə aparan yolun əsasını təşkil edən bu təməl üzərində işi davam etdirmək əzmindəyik. Sülhün təmin olunmasına yönəlmiş bu tarixi və böyük səylərin tanınması olaraq Baş nazir Paşinyan və Prezident Əliyev Prezident Trampın Nobel Sülh Mükafatına namizədliyini birgə irəli sürüblər.

Birgə Bəyannamə ABŞ-nin dəstəyi ilə Ermənistan və Azərbaycan üçün sülhü möhkəmləndirmək, rifaha nail olmaq və tərəfdaşlığı dərinləşdirmək məqsədilə aydın yol xəritəsi təmin edib. Bu cəsarətli liderlərin görüşündən ötən bir il ərzində ölkələr davamlı uğur üçün əsaslar yaradıblar.

Ermənistan və Azərbaycan Ermənistan-Azərbaycan sərhədi boyunca sabitliyi qoruyub saxlayıb, həmçinin münasibətlərin normallaşdırılması, sərhədlərin delimitasiyası və uzunmüddətli sabitliyin təmin edilməsi üçün həyati əhəmiyyət daşıyan tədbirlər vasitəsilə qarşılıqlı etimadın möhkəmləndirilməsi istiqamətində konkret addımlar atırlar.

“Tramp Sülh və Rifah naminə Marşrutu” (TRIPP) multimodal tranzit marşrutu baxışdan reallığa çevrilir. Buna nümunə kimi TRIPP-in inkişaf etdirilməsi məqsədilə infrastrukturun inkişafını irəli aparacaq şirkətin yaradılması ilə bağlı Ermənistan-ABŞ razılaşmasını göstərmək olar. Ermənistanda artıq mühəndislik araşdırmaları aparılır. Azərbaycan öz ərazisində Ermənistan ərazisində yerləşən TRIPP-ə qoşulmaq üçün avtomobil yolunun və dəmir yolunun tikintisini demək olar ki, başa çatdırıb. Üç ölkə TRIPP çərçivəsində elektrik ötürücü xəttinin tikintisini də dəstəkləyir.

ABŞ Cənubi Qafqaz və Mərkəzi Asiya hissələrində Trans-Xəzər Ticarət Marşrutuna (Orta Dəhliz) özəl sektor investisiyalarının cəlb edilməsinə kömək göstərmək məqsədilə Trans-Xəzər Müəssisələr Fonduna 201 milyon dollar qrant ayırıb.

ABŞ Ermənistan və Azərbaycanla əlaqələrini dərinləşdirərək enerji təhlükəsizliyi, sərhəd infrastrukturu və təhlükəsizliyi, süni intellekt və yarımkeçiricilər sahəsində innovasiyalar, eləcə də kritik faydalı qazıntılar üzrə yeni ikitərəfli strateji tərəfdaşlıqları müəyyən edən xartiyalar və anlaşma memorandumları imzalayıb. Bunlar üç dövlətin uzunmüddətli rifahına töhfə verir və artıq nəzərəçarpacaq nəticələr ortaya qoyub.

"Ağ Ev"də keçirilmiş Sülh Sammitinin ruhuna uyğun olaraq, Azərbaycan Ermənistanla bağlı bütün tranzit məhdudiyyətlərini birtərəfli qaydada aradan qaldırıb. Ötən bir il ərzində Azərbaycan ərazisindən Ermənistana və Ermənistandan təxminən 60 min ton yük daşınıb. Azərbaycan həmçinin Ermənistana 20 min ton neft məhsulu tədarük edib. İki ölkə ikitərəfli ticarətin artırılması istiqamətində fəaliyyətini davam etdirir.

İki ölkənin telekommunikasiya operatorları internet bağlantısı ilə bağlı saziş imzalayıblar. Bu saziş regional bağlantıların şaxələndirilməsinə, Cənubi Qafqazda etibarlılığın və dayanıqlılığın artırılmasına, eləcə də Avrasiyanın telekommunikasiya şəbəkələrinin infrastrukturunun inkişafına töhfə verəcək.

Ermənistan və Azərbaycanın birgə müraciəti əsasında ATƏT-in Minsk qrupu və onunla əlaqəli strukturlar ləğv edilib. Bu, həll olunmamış münaqişə dövrünün başa çatdığının etirafı kimi qiymətləndirilir.

ABŞ-nin dəvəti ilə Ermənistan və Azərbaycan Sülh Şurasına qoşulublar. Bununla onlar ABŞ-nin daha dinc və firavan dünya qurmaq səylərinin yanında olduqlarını nümayiş etdiriblər.

ABŞ, Ermənistan və Azərbaycan Ermənistan və Azərbaycanın beynəlxalq səviyyədə tanınmış sərhədləri daxilində suverenliyinə, ərazi bütövlüyünə və yurisdiksiyasına sarsılmaz dəstəklərini bir daha təsdiqləyirlər. Üç ölkə avqustun 8-də imzalanmış Birgə Bəyannamənin həm hərfinə, həm də ruhuna uyğun olaraq tam şəkildə həyata keçirilməsinə, eləcə də regionun müstəsna iqtisadi potensialının üzə çıxarılmasına sadiq qalmaqda davam edir. Bundan əlavə, ABŞ Ermənistan və Azərbaycanla imzalanmış ikitərəfli xartiyaların və anlaşma memorandumlarının tam şəkildə həyata keçirilməsinə, həmçinin hər iki ölkə ilə ikitərəfli münasibətlərinin daha da möhkəmləndirilməsinə sadiqliyini davam etdirir.

Əsl sülh heç vaxt bir gündə qurulmur. Lakin Prezident Trampın dediyi kimi: “Vədlər verilib, vədlər yerinə yetirilib”. Ermənistan və Azərbaycanın davamlı sülh istiqamətində atdığı addımlar bütün dünya üçün nümunədir və biz regionu parlaq və firavan gələcəyin gözlədiyinə inanırıq”, — deyə bəyanatda qeyd olunur.