Türkiyə parlamenti PKK silahlılarını amnistiya etmək istəyir

Türkiyə parlamenti hökumətin sülh təşəbbüsü çərçivəsində minlərlə kürd silahlısı üçün şərti amnistiya və əfv mexanizmini nəzərdə tutan qanun layihəsini müzakirə etməyə başlayıb.

"PostMedia" xəbər verir ki, bu barədə "Associated Press" məlumat yayıb.

Ötən il 1984-cü ildən silahlı mübarizə aparan Kürdüstan Fəhlə Partiyası (PKK) həbsdə olan lideri Abdullah Öcalanın çağırışı ilə mübarizəni dayandırdığını, silahı yerə qoyacağını və özünü buraxacağını açıqlamışdı. Təşkilat İraqda simvolik silahı yerə qoyma mərasimi keçirib və silahlılarının bölgədən çıxarılacağını bildirib.

Qanun layihəsində PKK-nın minlərlə üzvünün silahı yerə qoyması və cəmiyyətə reinteqrasiyası proseduru təsvir olunur. Sənədə əsasən, yeni cinayətlərin törədilməməsi şərtilə həbs cəzalarının icrası və məhkəmə prosesləri 5–10 il müddətinə dayandırıla bilər. Lakin qəsdən adam öldürməyə görə məhkum edilənlər, eləcə də 2005-ci ilədək ömürlük həbs cəzası alan şəxslər, o cümlədən Abdullah Öcalan amnistiyaya cəlb olunmayacaq.

Bu tədbirlər yalnız Türkiyənin Milli Təhlükəsizlik Şurası PKK-nın tamamilə buraxıldığını və silahlarını təhvil verdiyini təsdiqlədikdən sonra qüvvəyə minəcək.

Təşəbbüsün Prezident Rəcəb Tayyib Ərdoğanın mövqelərini gücləndirə biləcəyi bildirilir. Bu halda Ərdoğan səlahiyyət müddətinin uzadılması ilə bağlı mümkün siyasi proseslərdə kürdyönlü DEM Partiyasının dəstəyini əldə edə bilər.

PKK ilə əlaqəli media qurumları qanun layihəsini “başlanğıc” adlandırsa da, sənəddə ciddi çatışmazlıqların olduğunu bildiriblər. Onlar Öcalanın azadlığa buraxılmasını, demokratik islahatların həyata keçirilməsini və geri qayıdan silahlılar üçün siyasi fəaliyyət azadlığına təminat verilməsini tələb edirlər.

Qanun layihəsinin Ərdoğanın hakim partiyasının, onun millətçi müttəfiqlərinin, kürdyönlü DEM Partiyasının və əsas müxalifət partiyasının deputatlarının dəstəyi ilə qəbul ediləcəyi gözlənilir.

Millətçi İYİ Partiyasının lideri isə təşəbbüsə qarşı çıxaraq qanunun yalnız Ərdoğanın hakimiyyətdə qalmasına yol açdığını bildirib.