Dünyanın ən yaşlı prezidenti iki aydan sonra vətəninə qayıdıb

21-avqust-2026, 03:50

Yazı Ölçüsü:

Kamerun Prezidenti Pol Biya iki aydan çox davam edən yoxluqdan sonra ölkəyə qayıdıb. Onun uzun müddət ölkədə olmaması 93 yaşlı dövlət başçısının səhhəti və mümkün siyasi boşluqla bağlı suallar doğurmuşdu.

"PostMedia" xəbər verir ki, bu barədə “Associated Press” məlumat yayıb.

Biya cümə axşamı Cenevrədən paytaxt Yaoundenin beynəlxalq hava limanına gəlib. O, xaricdə 10 həftədən çox vaxt keçirib.

Dünyanın ən yaşlı fəaliyyətdə olan prezidenti olan Biya 1982-ci ildən Kameruna rəhbərlik edir. Oktyabrda keçirilən seçkilərdə qalib gəldikdən sonra noyabr ayında prezident kimi səkkizinci müddətinə başlayıb.

Dövlət başçısı Kamerundan iyunun 7-də ayrılmışdı. Həmin vaxt onun administrasiyası bunun “Avropada qısamüddətli şəxsi səfər” olduğunu bildirmişdi. Lakin onun ölkədə olmaması nəticədə bütün prezidentliyi dövründəki ən uzunmüddətli yoxluğa çevrilib.