Trampın mətbuat katibi vəzifəsindən gedir

ABŞ Prezidenti Donald Tramp Ağ Evin mətbuat katibi Kerolayn Levittin avqustun sonunda vəzifəsini tərk edəcəyini açıqlayıb. Levittin bu qərarı uşaqları və ailəsi ilə daha çox vaxt keçirmək üçün verdiyi bildirilib.

Bununla yanaşı, Levitt Trampın əsas xarici siyasət müşavirlərindən biri olaraq qalacaq və Respublikaçılar Partiyasında mühüm rol oynamağa davam edəcək.

“Bizim möhtəşəm Ağ Ev mətbuat katibimiz və ən etibarlı köməkçilərimdən biri Kerolayn Levitt ayın sonunda vəzifəsini tərk edəcək ki, gözəl kiçik uşaqları və ailəsi ilə daha çox vaxt keçirə bilsin. Mən bu qərarı tamamilə anlayır və hörmətlə qarşılayıram”, – Tramp Truth Social sosial şəbəkəsində yazıb.

ABŞ Prezidenti qeyd edib ki, Ağ Evdən ayrıldıqdan sonra Levitt onun aparıcı xarici siyasət müşavirlərindən birinə çevriləcək və Respublikaçılar Partiyasında nüfuzlu mövqeyini qoruyacaq.

“Kerolayn bundan sonra mənim əsas xarici siyasət müşavirlərimdən biri və Respublikaçılar Partiyasında nüfuzlu səs olacaq. Biz tarixin gedişatına meydan oxumaq və aralıq seçkilərində inamlı qələbə qazanmaq istiqamətində çalışacağıq”, – Tramp bildirib.

O, Levittin Ağ Evdəki fəaliyyətini yüksək qiymətləndirib və onun 2025-ci ildən bu vəzifəni tutduğunu, Trampın siyasi kursunu fəal şəkildə dəstəklədiyini vurğulayıb.

“Kerolayn Ağ Evdə əsl lider idi və öz işini fenomenal şəkildə yerinə yetirirdi. O, 2018-ci ildən ədalət, azadlıq və hüquqlar uğrunda, o cümlədən 2024-cü ildəki tarixi yenidən seçilmə kampaniyamızda mübarizə aparıb”, – ABŞ Prezidenti qeyd edib.

Tramp Levitti eyni zamanda “Ağ Evin tarixində ən yaxşı mətbuat katiblərindən biri” adlandırıb və fəaliyyətinə görə ona təşəkkür edib.