Britaniya aviaşirkəti uşaqlar üçün gözlənilməz qayda tətbiq edib

"easyJet" aviaşirkəti valideynlərə hava limanında problem yarada biləcək qeyri-adi bir qaydanı xatırladıb. Belə ki, bəzi uşaq oyuncaqlarını əl yükündə aparmaq olmaz.

"PostMedia" xəbər verir ki, bu barədə "Express" yazıb.

Söhbət real silahla səhv salına biləcək oyuncaq tapançalardan, odlu silah maketlərindən və onların imitasiyalarından gedir. Aviaşirkət bu əşyaları qadağan olunmuş əşyalar kateqoriyasına daxil edir və onların təyyarənin salonuna keçirilməsinə icazə vermir.

Bununla belə, səfərdən əvvəl uşağın sevimli oyuncağını atmaq lazım deyil. easyJet oyuncaq silahların qeydiyyata verilən baqajda daşınmasına icazə verir.

Eyni zamanda, aviaşirkətlərin qaydaları bir-birindən fərqlənir. Məsələn, Ryanair oyuncaq tapançaların və onların maketlərinin həm əl yükündə, həm də qeydiyyata verilən baqajda daşınmasını qadağan edir. TUI və Jet2 aviaşirkətlərində də bu cür əşyalara məhdudiyyətlər tətbiq olunur.

Bu səbəbdən easyJet sərnişinlərə səfərdən əvvəl məhz istifadə etdikləri aviaşirkətin qadağan olunmuş əşyalar siyahısını yoxlamağı tövsiyə edir.

easyJet Böyük Britaniyanın 22 hava limanından uçuşlar həyata keçirir və Avropada və onun hüdudlarından kənarda təxminən 140 istiqamətə 640-dan çox marşrut təklif edir.