Mark Zukerberq süni intellekti müdafiə edən manifest yayımlayıb

"Meta"nın rəhbəri Mark Zukerberq səhər saatlarında 6500 sözdən ibarət geniş proqram sənədi yayımlayıb.

"PostMedia" xəbər verir ki, o, sənəddə süni intellektin müdafiəsi istiqamətində qəti mövqe ortaya qoyub. Onun fikrincə, süni intellektlə bağlı qorxular şişirdilir, ən böyük təhlükə isə texnologiyanın özündən deyil, onun inhisara alınmasından qaynaqlanır.

Manifestin əsas müddəaları:

Zukerberq texnologiya üzərində bir hökumətin və ya qurumun həddindən artıq böyük hakimiyyət əldə etməsi ssenarisini əsas risk hesab edir. O, Axios-a müsahibəsində deyib: “Şəxsən məni başqalarının danışdığı konkret risklərdən daha çox, gücün mərkəzləşməsi narahat edir”.

Zukerberq hər kəsə qabaqcıl alətlərə pulsuz və ya münasib qiymətə çıxış imkanının yaradılmasını dəstəkləyir. Bununla yanaşı, ABŞ və demokratik ölkələrin liderliyinin vacibliyini vurğulayır.

Onun qiymətləndirməsinə görə, Amerika modellərinin hazırlanmasının istənilən müddətə, hətta bir ay müddətinə belə ləngidilməsi ABŞ-ın liderliyini zəiflədə və xarici rəqiblərə, ilk növbədə Çinə üstünlük qazandıra bilər.

Meta açıq modellərin buraxılışını yenidən bərpa edir. Şirkət yeni Muse Glimmer modelinin çəkilərini açıq şəkildə təqdim edir. Şirkətin məlumatına görə, bu model öz sinfində ən məhsuldar modellərdən biridir. Meta həmçinin Muse Spark 1.2 baza modelinin yaxın zamanda təqdim ediləcəyini açıqlayıb.

Meta-nın gələcək süni intellekt agenti məhsulları gücləndirilmiş məxfilik rejiminə sahib olacaq. Şirkət hətta xidmət təminatçısının özünün belə giriş əldə edə bilməyəcəyi tam məxfi rejimin tətbiq olunacağını vəd edir.

Məlumat mərkəzlərinin tikintisi ilə bağlı tənqidlər fonunda Meta yerli Amerika icmalarına dəstək göstərmək məqsədilə 1 milyard dollarlıq Future is for Everyone Fund fondunu işə salır. Şirkət həmçinin işçi peşələri sahəsində kadrların hazırlanması məqsədilə America’s Workforce Academy təşəbbüsünü inkişaf etdirir.