"İslamabad memorandumu ABŞ məğlubiyyətinin simvoluna çevrilib": Qalibaf Bakıda

İran parlamentinin (Məclisin) sədri Məhəmməd Baqir Qalibaf bəyan edib ki, İran və ABŞ arasında imzalanmış İslamabad anlaşma memorandumu təzyiqlərin nəticəsi deyil, əksinə, "İran xalqının gücünü və dözümlülüyünü əks etdirir".

"PostMedia" xəbər verir ki, bu barədə İranın "Mehr" agentliyi məlumat yayıb.

Bakıda keçirilən İslam Əməkdaşlıq Təşkilatına üzv dövlətlərin Parlament İttifaqının (PUIC) 20-ci konfransında çıxış edən Qalibaf vurğulayıb ki, istənilən danışıqlar yalnız qarşı tərəf öz şərtlərini diktə etmək cəhdlərindən imtina etdikdə və digər ölkənin hüquqlarını tanıdıqda nəticə verir.

"İslamabad memorandumu təzyiq və məcburiyyətin nəticəsi deyildi, əksinə, cəsur İran xalqının müqavimətinin və gücünün nəticəsinə çevrildi. Bu razılaşma göstərdi ki, dialoq yalnız qarşı tərəf öz iradəsini sivil bir xalqa zorla qəbul etdirmək cəhdindən əl çəkdikdə və bizim hüquqlarımızı tanıdıqda nəticə verir. Buna görə də memorandum ABŞ-nin məğlubiyyət bəyannaməsinə çevrildi", - deyə İran parlamentinin sədri bildirib.

Qalibaf qeyd edib ki, münaqişə zamanı 3 mindən çox iranlı həlak olub, onların arasında qadınlar və uşaqlar da var, 30 mindən çox insan isə yaralanıb. O bildirib ki, zərbələr sənaye, tibb, təhsil, energetika və nəqliyyat infrastrukturuna, eləcə də yaşayış obyektlərinə ziyan vurub.

Qalibaf əlavə edib ki, İran silahlı qüvvələrinin dözümlülüyü və əhalinin müqaviməti ABŞ və İsrail üçün ciddi itkilərə (xərclərə) səbəb olub və onların məqsədlərini puça çıxarıb.

İran parlamentinin sədri həmçinin bəyan edib ki, İran regionun gələcəyini qarşıdurmada deyil, əməkdaşlıq və birgə təhlükəsizlikdə görür. O, iqtisadi, elmi və siyasi sahələrdə islam ölkələri ilə əməkdaşlığın genişləndirilməsinə hazır olduqlarını da ifadə edib.