Ramzan Kadırovun oğulları Səudiyyə şahzadəsi ilə görüşdə iştirak ediblər

Çeçenistan Respublikası hökuməti sədrinin müavini, fiziki tərbiyə və idman naziri Əhməd Kadırov Səudiyyə Ərəbistanı şahzadəsi Turki bin Məhəmməd Al Səud ilə görüşüb.

"PostMedia" xəbər verir ki, görüş barədə Çeçenistan rəhbəri Ramzan Kadırov özünün "Telegram" kanalında məlumat verib.

Görüşdə Ramzan Kadırovun oğulları Əli, Adam və Həmzət Kadırovlar da iştirak ediblər.

Danışıqlar zamanı Əhməd Kadırov Səudiyyə Ərəbistanının vəliəhd şahzadəsi Məhəmməd bin Salman Al Səuda ünvanlanmış rəsmi məktubu şahzadəyə təqdim edib.

Tərəflər Çeçenistan Respublikası ilə Səudiyyə Ərəbistanı arasında ikitərəfli əməkdaşlıq məsələlərini, o cümlədən humanitar və dini sahələrdə əlaqələri, həmçinin Rusiyadan gələn zəvvarlar üçün həcc və ümrə ziyarətlərinin təşkilini müzakirə ediblər.

Görüşdə Rusiya-Səudiyyə münasibətlərinin möhkəmləndirilməsinin və qarşılıqlı maraq doğuran müxtəlif istiqamətlər üzrə əməkdaşlığın inkişafının vacibliyi xüsusi vurğulanıb.

Həmsöhbətlər Səudiyyə Ərəbistanını müsəlmanlar üçün əsas ölkə adlandıraraq, müqəddəs Məkkə və Mədinə şəhərlərinin burada yerləşdiyini qeyd ediblər. Zəvvarlara dəstək və dini səfərlər zamanı onların şəraitinin yaxşılaşdırılması məsələlərinə də diqqət yetirilib.

Tərəflər dialoqun davam etdirilməsi və regionlar, eləcə də ölkələr arasında əməkdaşlığın genişləndirilməsi istiqamətində hazır olduqlarını bildiriblər.