CNN: ABŞ zənginləşdirilmiş uranı ələ keçirmək üçün İranda quru əməliyyatını nəzərdən keçirib

ABŞ Silahlı Qüvvələrinin yüksək rütbəli rəsmiləri yüksək dərəcədə zənginləşdirilmiş uran ehtiyatlarını ələ keçirmək məqsədilə İranda quru əməliyyatı keçirmək planlarını müzakirə ediblər.

"PostMedia" xəbər verir ki, bu barədə CNN telekanalı vəziyyətlə tanış olan mənbələrə istinadən məlumat yayıb.

Telekanalın məlumatına görə, ötən ayın sonunda ABŞ Silahlı Qüvvələrinin Qərargah Rəisləri Komitəsinin sədri general Den Keyn ABŞ Silahlı Qüvvələrinin Floridadakı Mərkəzi Komandanlığının qərargahına təcili səfər edib və burada mümkün əməliyyatla bağlı qapalı brifinqdə iştirak edib. Bundan sonra o, mümkün fəaliyyət variantları barədə ABŞ Prezidenti Donald Trampa məruzə edib.

CNN qeyd edir ki, ABŞ administrasiyası yüksək riskli quru əməliyyatını təsdiqləməyə çox yaxın olub, lakin Tramp İran tərəfinin mümkün sərt cavabı, amerikalı hərbçilər arasında ciddi itki riski və dünya iqtisadiyyatının daha da qeyri-sabitləşməsi təhlükəsi barədə xəbərdarlıqlardan sonra bu addımdan imtina etmək qərarına gəlib. Telekanalın mənbələrinin bildirdiyinə görə, bu fonda Vaşinqton Tehranla Hörmüz boğazı və İranın nüvə proqramı üzrə saziş üzərində işi davam etdirib.