Çin avtomobil istehsalçıları qarşıdakı 5–10 ildə ABŞ bazarına daxil olacaq - "Ford"un rəhbəri

03-avqust-2026, 05:13

Yazı Ölçüsü:

"Ford Motor Company"nin baş direktoru Cim Farli şirkət əməkdaşlarına bildirib ki, Çin avtomobil istehsalçıları mövcud ticarət məhdudiyyətlərinə baxmayaraq, qarşıdakı 5–10 il ərzində ABŞ bazarına daxil olacaqlar.

"PostMedia" xəbər verir ki, bu barədə "Jalopnik" məlumat yayıb.

Görüşdə iştirak edən mənbələrin sözlərinə görə, Farli hesab edir ki, Çin markalarının ABŞ bazarında görünməsi demək olar ki, qaçılmazdır. Onun fikrincə, bunun baş verməsi üçün ən real vaxt məhz göstərilən dövrün sonlarına təsadüf edəcək.

Hazırda Çin elektromobil istehsalçıları ABŞ-a qonşu ölkələrin, o cümlədən Meksikanın bazarında mövqelərini gücləndirirlər. Ekspertlər isə Kanadanı ABŞ bazarına çıxmazdan əvvəl mümkün "sınaq meydançası" kimi qiymətləndirirlər.

Hazırda isə Çin istehsalı olan elektromobillərin ABŞ-da satışı ciddi şəkildə məhdudlaşdırılıb. Ölkədə bu avtomobillərə əlavə 100 faizlik gömrük rüsumu tətbiq olunur. Bundan başqa, avtomobillərdə Çin mənşəli proqram təminatı və avadanlıqlardan istifadəyə də qadağalar qüvvədədir.

Artan rəqabət fonunda Ford qiymət və səmərəlilik baxımından Çin modelləri ilə rəqabət apara biləcək daha münasib qiymətli yeni elektromobil xəttini hazırlayır.