Polşada ukraynalı iş adamı 171 elektrik velosipedinin oğurlanması işi üzrə saxlanılıb

Ukrayna Xarici İşlər Nazirliyi Polşada Avropa Həbs Orderi əsasında saxlanılan "CEO Club Ukraine" biznes icmasının direktoru Dmitri Karçuka konsul girişinin təmin olunmasına çalışır.

"PostMedia" xəbər verir ki, bu barədə "Yevropeyskaya Pravda" nəşri məlumat yayıb.

Karçuk Almaniyadan 171 elektrik velosipedinin oğurlanması işi üzrə şübhəli bilinir. Lakin biznes icmasının nümayəndələri onun şəxsi məlumatlarının oğurlanması nəticəsində dələduzluğun qurbanı ola biləcəyini bildirirlər.

Ukrayna XİN-dən verilən məlumata görə, Karçukun Pşemışl şəhərində saxlanılması barədə xəbər daxil olduqdan sonra Ukraynanın Lyublin şəhərindəki Baş Konsulluğu Polşa tərəfinə onunla görüşə icazə verilməsi üçün müraciət edib. Kiyev konsul girişinin mümkün qədər tez təmin olunmasını gözləyir və işi nəzarətdə saxlayır.

Karçuk iyulun 28-də Budomej sərhəd-keçid məntəqəsində saxlanılıb. Almaniya istintaqının məlumatına görə, o, 2024-cü ildə saxta nəqliyyat sənədlərindən istifadə edərək özünü logistika şirkətinin əməkdaşı kimi təqdim edib və dəyəri 126 min avrodan çox olan elektrik velosipedləri yükünü qanunsuz ələ keçirib.

CEO Club Ukraine-ın prezidenti Sergey Qaydaçuk bildirib ki, saxlanılma Karçukun hərəkətləri ilə deyil, onun şəxsi məlumatlarının cinayətkarlar tərəfindən istifadə olunması ilə bağlı ola bilər. Onun sözlərinə görə, iddia olunan cinayətin baş verdiyi dövrdə Karçuk Ukraynada olub, diz əməliyyatından sonra reabilitasiya müalicəsi keçib və istintaq materiallarında göstərilən yük avtomobilini idarə etməsi mümkün olmayıb.

Biznes icmasının iddiasına görə, Karçukun həmin vaxt harada olduğunu təsdiqləyən sübutlar, o cümlədən sərhəd keçidi qeydləri və görüşdüyü şəxslərin ifadələri mövcuddur.

Bununla belə, yükü əslində kimin qəbul etdiyi və ukraynalı sahibkarın şəxsi məlumatlarının bu işə necə daxil olduğu hələ də məlum deyil.