Meksikada ABŞ-nin başına 5 milyon dollar mükafat qoyduğu "Ponço" ləqəbli narkokartel rəhbəri saxlanılıb

03-avqust-2026, 02:45

Yazı Ölçüsü:

Meksika hərbçiləri "Ponço" və ya "Ponço La Kiringua" ləqəbi ilə tanınan Alfonso Fernandes Maqalyonu saxlayıblar. Hakimiyyət onu "Los Reyes" narkokartelinin rəhbərlərindən biri və ABŞ-də ən uzun müddətdir axtarışda olan cinayətkarlardan biri hesab edir.

"PostMedia" xəbər verir ki, bu barədə "Roya News" məlumat yayıb.

Əməliyyat Meksikanın qərbində yerləşən Miçoakan ştatında məhkəmə qərarı əsasında keçirilib. Meksikanın Təhlükəsizlik və Vətəndaşların Müdafiəsi naziri Omar Qarsiya Harfuçun sözlərinə görə, Fernandes Maqalyon qanunsuz azadlıqdan məhrumetmə və iğtişaşlara təhrik etməkdə şübhəli bilinir.

Bundan əvvəl ABŞ onun tutulmasına gətirib çıxaracaq məlumat üçün 5 milyon dollara qədər mükafat elan etmişdi.

ABŞ hakimiyyətinin məlumatına əsasən, "Ponço" bir neçə cinayətkar qruplaşmanı birləşdirən Carteles Unidos ("Birləşmiş Kartellər") alyansının əsas rəhbərlərindən biri olub. Bu alyans 2025-ci ilin fevralında ABŞ tərəfindən xarici terror təşkilatları siyahısına daxil edilib.

Saxlanılmadan sonra kartelin ehtimal olunan üzvləri Miçoakanda zorakılıq aksiyalarına əl atıblar. Los Reyes və Periban bələdiyyələrində yollar bağlanıb, bir neçə avtomobil yandırılıb.

Hazırda hüquq-mühafizə orqanları bölgədə əməliyyatları davam etdirərək asayişi bərpa etməyə və yeni toqquşmaların qarşısını almağa çalışırlar.