İtaliyada ən böyük kokain partiyalarından biri aşkarlanıb

İtaliya Maliyyə Polisi və Gömrük Xidməti Vado Liqure limanında keçirdiyi xüsusi əməliyyat zamanı 770 kiloqram kokain müsadirə edib. Ələ keçirilən narkotik partiyasının qara bazar dəyəri təxminən 250 milyon avro qiymətləndirilir.

"PostMedia" xəbər verir ki, "RMF 24"ün məlumatına görə, bu, son illərdə aşkarlanan ən böyük kokain partiyalarından biridir. Yüksək keyfiyyətli narkotik Ekvadordan gətirilən soyuducu konteynerdə banan altlıqlarının arasında ustalıqla gizlədilib.

Qaçaqmalçılar yükü meyvələrin arasında gizlədərək gömrük nəzarətindən keçirməyə ümid etsələr də, hüquq-mühafizə orqanlarının diqqəti onların planını pozub.

Müsadirə Vado Liqure limanında son illərin ən iri antinarkotik əməliyyatlarından biri hesab olunur və Avropaya yönələn narkotik qaçaqmalçılığına ciddi zərbə vurub.

Bundan cəmi üç həftə əvvəl eyni limanda daha 340 kiloqram kokainin ölkəyə gətirilməsinin qarşısı alınmışdı. Belə halların artması fonunda İtaliya hakimiyyəti limanda nəzarət tədbirlərinin əhəmiyyətli dərəcədə sərtləşdiriləcəyini bildirib.