Rusiya Ukraynanı Türkiyənin suverenliyinə qarşı yönəlmiş addımda ittiham edib

"Türkiyənin ərazi sularında yerləşən tanker gəmilərinə hücum həmin ölkənin suverenliyinə qarşı yönəlmiş addımdır".

"PostMedia" xəbər verir ki, bunu Kremlin sözçüsü Dmitri Peskov “İnterfaks”a açıqlamasında bildirib.

“Xüsusilə Türkiyənin ərazi sularında ticarət gəmilərinə, tankerələrə hücum çox ciddi və qəbuledilməz hadisədir. Bu, Türkiyə Respublikasının suverenliyinə qarşı təcavüzdür, həmçinin həmin gəmilərin sahiblərinin təhlükəsizliyinə və mülkiyyətinə təhdiddir. Hadisə bir daha Kiyev rejiminin mahiyyətini açıq şəkildə göstərir”, – Peskov qeyd edib.

Xatırladaq ki, noyabrın 28-də Qara dənizdə Qambiya bayrağı altında üzən Kairos və Virat tanker gəmilərində yanğın baş verib. Türkiyənin nəqliyyat və infrastruktur naziri Abdulkadir Uraloğlu bildirib ki, Novorossiyskə gedən gəmilərdə yanğın partlayışlardan sonra başlayıb və hadisə xarici təsirlə bağlıdır.

Nazirin sözlərinə görə, tanker gəmiləri mina partlayışı, səthdən hərəkət edən pilotsuz aparat və ya raket zərbələri ilə vurula bilərdi. Virat tankeri isə noyabrın 29-da yenidən PUA hücumuna məruz qalıb.