Zelenski Madridə silah almağa gedir

Ukrayna Prezidenti Volodimir Zelenski İspaniyaya səfəri çərçivəsində bu ölkənin şirkətləri ilə müdafiə sazişi imzalayacaq.

"PostMedia" xəbər verir ki, "Bloomberg" bu barədə anonim rəsmilərə istinadən məlumat yayıb.

Zelenski müdafiə və texnologiya sahəsində fəaliyyət göstərən 13 şirkətin nümayəndələri, həmçinin İspaniyanın müdafiə naziri Marqarita Robles ilə görüşəcək. Agentlik qeyd edir ki, görüşün məqsədi İspaniyanın müdafiə sənayesinin imkanlarını nümayiş etdirməkdir. Təqdim olunan şirkətlər arasında ölkənin ən böyük müdafiə podratçısı olan "Indra Sistemas" holdinqi də var.

Bundan əvvəl Krallığın xarici işlər naziri Xose Manuel Albares bildirmişdi ki, İspaniya hökuməti Kiyevə ayrılan hərbi texnikanın ötənilki maliyyələşdirməsini qorumağı planlaşdırır və ilin sonuna qədər hərbi yardımın ümumi məbləğini 1 milyard avroya çatdırmağı nəzərdə tutur.

Çərşənbə axşamı Zelenski Madriddə İspaniyanın baş naziri Pedro Sançeslə də görüşəcək.