Böyük Britaniyada apreldən bəri 90-dan çox məhbus səhvən azadlığa buraxılıb

Böyük Britaniyada bu ilin aprelindən etibarən ümumilikdə 91 məhbusun səhvən azadlığa buraxıldığı müəyyən edilib.

""PostMedia" Britaniya mediasına istinadən xəbər verir ki, hadisə hökumətə qarşı artan ictimai və siyasi təzyiqlərə səbəb olub.

Ədliyyə Nazirliyinin noyabrın 12-də açıqladığı rəsmi məlumata əsasən, bu hallar 1 aprel – 31 oktyabr tarixləri arasında qeydə alınıb.

Ədliyyə naziri Deivid Lami məsələyə görə, xüsusilə də Haduş Kebatu adlı miqrantın səhvən azadlığa buraxılması ilə bağlı qalmaqallı hadisədən sonra parlament üzvlərinin suallarını cavablandırmalı olacaq. Kebatu daha əvvəl Epping (Essex) şəhərində keçirilən etiraz aksiyalarında iştirak etdiyi üçün deportasiya olunmuşdu.

Lami bildirib ki, hökumət bu rəqəmləri azaltmaq üçün dərhal tədbirlər görəcək:

“Mən bu xoşagəlməz meyli çevirmək üçün görülən addımları bu gün parlamentdə ətraflı izah edəcəyəm”, – deyə o, Avam Palatasındakı çıxışında vurğulayıb.

Müxalifətin ədliyyə məsələləri üzrə kölgə naziri Robert Cenrik isə hökuməti şəffaflığa çağırıb və əlavə edib ki, Kebatu və digər iki məhbusun səhvən azad edilməsi “buzdağının görünən hissəsidir”.

Hadisələrdən biri oktyabrın 29-da "Vandsworth" həbsxanasında baş verib. Belə ki, 24 yaşlı Əlcəzair vətəndaşı Brahim Kadur-Şerif səhvən azadlığa buraxılıb, lakin polis əməliyyatı nəticəsində bir neçə gün sonra yenidən tutulub.

Eyni həbsxanada 35 yaşlı Billi Smit adlı məhbus da ötən həftə səhvən azad edilib, lakin o, sonradan könüllü şəkildə polisə təslim olub.

Hadisələrdən sonra bütün həbsxanalarda təhlükəsizlik yoxlamaları gücləndirilib, həmçinin Kebatu işinə dair müstəqil istintaq başladılıb.