Böyük Britaniya Suriyanın prezidentinə qarşı sanksiyaları ləğv edib, Aİ də eyni addımı atacaq

Böyük Britaniya cümə günü Suriyanın prezidenti Əhməd əl-Şəraya qarşı tətbiq olunan sanksiyaları ləğv edib.

"PostMedia" xəbər verir ki, bu addım BMT Təhlükəsizlik Şurasının bir gün əvvəl analoji qərar qəbul etməsindən sonra atılıb. Qərar, gələn həftə Şəraa ilə ABŞ prezidenti Donald Tramp arasında gözlənilən görüş ərəfəsində verilib.

Britaniya hökumətinin rəsmi saytında yayılan məlumata görə, Suriyanın daxili işlər naziri Anas Xəttab-a qarşı sanksiyalar da aradan qaldırılıb. Hər iki şəxs əvvəllər İŞİD və “Əl-Qaidə” ilə əlaqələrə görə maliyyə sanksiyalarına məruz qalmışdı.

Avropa İttifaqının (Aİ) nümayəndəsi bildirib ki, BMT-nin bu qərarı Aİ-nin öz sanksiya siyahısında da əks olunacaq.

Britaniya Suriyaya qarşı bəzi sanksiyaları bu ilin aprelində, Aİ isə may ayında yumşaldıb. Bununla belə, silah ticarəti və təhlükəsizliklə bağlı məhdudiyyətlər qüvvədə qalır.

“Biz Suriyanın gələcəyi naminə sülh və inklüziv, suriyalıların rəhbərlik etdiyi keçid prosesinə dəstək verməyə sadiq qalırıq,” – Avropa Komissiyasının sözçüsü bildirib.

Əhməd əl-Şəra əvvəllər Əbu Məhəmməd əl-Culani kimi tanınırdı. O, bu ilin yanvarında “Heyət Təhrir əş-Şam” (HTŞ) qruplaşmasının rəhbərlik etdiyi müxalif qüvvələrin ildırım sürətli hücumu nəticəsində Bəşər Əsəd rejimini devirdikdən sonra Suriyanın prezidenti olub.

Şəra 2014-cü ildən BMT və Britaniya tərəfindən sanksiyalara məruz qalmışdı. Həmin sanksiyalar səfər qadağası, aktivlərin dondurulması və silah embarqosunu əhatə edirdi.

BMT Təhlükəsizlik Şurası bu həftə həmin məhdudiyyətləri ləğv edib və qərarını HTŞ ilə “Əl-Qaidə” arasında artıq aktiv əlaqələrin olmaması ilə əsaslandırıb.

Qərar həmçinin gələn bazar ertəsi Vaşinqtonda Donald Tramp və Əhməd əl-Şəra arasında planlaşdırılan görüşdən əvvəl qəbul edilib.

Suriyanın hökuməti hələlik məsələ ilə bağlı rəsmi açıqlama verməyib.