Seltik klubundan Qəzzaya 100 min funt sterlinqlik humanitar yardım

Şotlandiyanın məşhur futbol klubu Seltik, Qəzzadakı aclıq və qida çatışmazlığı ilə mübarizəyə dəstək məqsədilə 100 min funt sterlinq məbləğində yardım edib.

"Postmedia" xəbər verir ki, klubun xeyriyyə fondu yardımı BMT-nin Ümumdünya Ərzaq Proqramı (WFP) vasitəsilə Qəzzadakı təcili qida ehtiyaclarının qarşılanması üçün ayırdığını açıqlayıb.

Fondun bəyanatında qeyd olunub ki, WFP dünyanın aclıqla mübarizədə ən böyük humanitar təşkilatıdır və bu yardım Qəzzada ağır şəraitdə yaşayan minlərlə insana ərzaq yardımı göstərmək üçün istifadə ediləcək.

Məlumata görə, hazırda Qəzzada 640 min insan aclıq səviyyəsində yaşayır, 132 min uşaq isə kəskin qidalanma çatışmazlığı səbəbindən ölüm riski altındadır.

Seltik klubu bu addımı ilə Qəzzadakı humanitar böhrana beynəlxalq diqqəti artırmağı və yardıma ehtiyacı olanlara dəstək olmağı hədəfləyir.