Dünyanın ən güclü passportları açıqlandı - Azərbaycan 72-ci yerdədir

“Henley Passport Index” 2025-ci iodə dünyanın ən güclü passportlarının reytinqini açıqlayıb.

”PostMedia” xəbər verir ki, Amerika Birləşmiş Ştatlarının pasportu tarixdə ilk dəfə olaraq ən güclü 10 pasport siyahısından çıxıb və 12-ci yerə geriləyib.

Reytinq, vizasız səfər edilə bilən istiqamətlərin sayına əsasən müəyyən edilir.

Amerikalılar hazırda 180 ölkəyə vizasız səyahət edə bilər – bu göstərici ilə ABŞ Malayziya ilə eyni səviyyədədir.

Bu ilin yanvarında ABŞ 9-cu, iyulda isə 10-cu yerdə idi.

ABŞ pasportu hazırda siyahıda Litva və İslandiyadan da geridədir.

Singapur pasportu 193 ölkəyə vizasız giriş imkanı ilə birinci yeri tutur.

Mütəxəssislər hesab edir ki, ABŞ-ın reytinqdə geriləməsinə “reciprocity” yəni qarşılıqlılığın zəif olması səbəb olub. Amerikalılar 227 istiqamətin 180-nə vizasız gedə bildiyi halda, ABŞ özü yalnız 46 ölkənin vətəndaşlarına vizasız giriş icazəsi verir. Bu göstərici ilə ABŞ Henley Açıq Qapı İndeksində 77-ci yerdə qərarlaşıb və İraqdan cüzi şəkildə öndədir.

ABŞ-nin reytinqdən düşməsinə təsir edən son faktorlara Braziliya ilə vizasız rejimin ləğvi, Çinin sürətlə genişlənən vizasız siyahısına daxil edilməməsi, Somali və Vyetnamın yeni viza sistemlərindən ABŞ-ni kənarda saxlaması göstərilir.

“Henley & Partners”in sədri Kristian H. Kaelinin sözlərinə görə ABŞ pasportunun zəifləməsi sadəcə reytinq dəyişikliyi deyil – bu, qlobal hərəkətlilik və yumşaq güc balansının dəyişdiyini göstərir.

”Açıq siyasət yürüdən ölkələr irəliləyir, üstünlüyünə arxayın olanlar isə geridə qalır”.

Siyahıda Azərbaycan 72-ci yerdədir. Belə ki, vətəndaşlarımız 71 ölkəyə vizasız giriş edə bilər. 

Beləliklə son sıralamada ən güclü passportu olan ölkələr bunlardır:

1. Sinqapur – 193
2. Cənubi Koreya – 190
3. Yaponiya – 189
4. Almaniya, İtaliya, Lüksemburq, İspaniya, İsveçrə – 188
5. Avstriya, Belçika, Danimarka, Finlandiya, Fransa, İrlandiya, Niderland – 187
6. Yunanıstan, Macarıstan, Yeni Zelandiya, Norveç, Portuqaliya, İsveç – 186
7. Avstraliya, Çexiya, Malta, Polşa – 185
8. Xorvatiya, Estoniya, Slovakiya, Sloveniya, BƏƏ, Böyük Britaniya – 184
9. Kanada – 183
10. Latviya, Lixtenşteyn – 182