Kallas Aİ ölkələrini Kiyevə hava hücumundan müdafiə raketləri verməyə çağırıb

Ukraynaya gələcəkdə yeni istehsal olunacaq raketlərin verilməsi vədi qarşılığında Brüssel “Patriot” hava hücumundan müdafiə sistemləri üçün raket ehtiyatlarına malik Aİ ölkələrini onları təcili şəkildə Kiyevə göndərməyə çağırır.

"PostMedia" xəbər verir ki, bunu Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas Aİ müdafiə nazirlərinin görüşünə gələrkən bildirib.

“Ukraynanın hava hücumundan müdafiə sistemlərinə təcili ehtiyacı var. “Patriot” raketləri ehtiyatına malik ölkələri onları dərhal Ukraynaya verməyə çağırırıq ki, sonradan yeni istehsal olunmuş raketləri əldə edə bilsinlər”.

Bu çağırış ilk növbədə Yunanıstan və İspaniyaya ünvanlanıb. Avropa KİV-lərinin məlumatına görə, bu ölkələrin hələ də müəyyən raket ehtiyatları var.

Xüsusilə, “Politico” qəzeti daha əvvəl yazıb ki, Yunanıstanda bu raketlərin istifadə müddəti başa çatmaq üzrədir. Bununla belə, Afina Ukraynaya son ehtiyatlarını verməyə hazır deyil. Çünki hava hücumundan müdafiə vasitələrinin qlobal çatışmazlığı şəraitində yeni tədarüklərin müddəti qeyri-müəyyən olaraq qalır və Türkiyə ilə mümkün münaqişə vəziyyətində ehtiyatlardan məhrum olmaq ölkəni müdafiəsiz vəziyyətə sala bilər.