Yaponiyanın yeni raketləri ilk dəfə ABŞ ilə birgə təlimlərdə iştirak edəcək – "Kyodo"

Yaponiyanın təxminən 1000 kilometrədək mənzilə malik yeni “Type-25” mobil raketləri ilk dəfə oktyabr ayında keçiriləcək ABŞ-Yaponiya birgə “Keen Sword” hərbi təlimləri zamanı nümayiş etdiriləcək. Hər iki tərəfdən on minlərlə hərbçinin iştirak edəcəyi təlimlər Yaponiyanın müxtəlif bölgələrində keçiriləcək.

"PostMedia" xəbər verir ki, bu barədə “Kyodo” xəbər agentliyi məlumat yayıb.

Təlimlərin dəqiq tarixləri və keçiriləcəyi yerlərin daha sonra açıqlanacağı gözlənilir. Bu manevrlər iki ildən bir keçirilir.

Quruda yerləşdirilən “Type-25” mobil raketləri ilk dəfə 2026-cı ilin martında Yaponiyanın cənub-qərbində yerləşən Kyuşu adasındakı Kumamoto prefekturasının “Kengun” hərbi bazasında daimi yerləşdirilib. “Keen Sword” təlimləri zamanı onlar həmin bölgədəki təlim poliqonlarından birinə köçürüləcək. ABŞ və Yaponiya hərbçiləri bu tip silahların hədəfə yönəldilməsi və tətbiqi üzrə birgə əməliyyatları məşq edəcəklər, lakin raketlərin real döyüş buraxılışları həyata keçirilməyəcək.

Rəsmi olaraq bu raketlər “gəmi əleyhinə” raketlər hesab olunur. Lakin Tokio onları potensial düşmənin bazalarına “cavab zərbəsi endirmək” vasitəsi kimi təqdim edir. Bu kontekstdə “Kyodo” agentliyi qeyd edir ki, Kyuşu adasından “Type-12” raketləri Çinin sahilyanı rayonlarına qədər çata bilir.

Yerli sakinlər isə belə silahların yerləşdirildiyi ərazilərin də hərbi zərbələrin hədəfinə çevrilə biləcəyindən narahatdırlar.