Tramp Ağ Evin yenidən qurulmasına təxminən 1 milyard dollar xərcləməyi planlaşdırır

Tramp Ağ Evin yenidən qurulmasına təxminən 1 milyard dollar xərcləməyi planlaşdırır – WP

12-avqust-2026, 20:59

Yazı Ölçüsü:

ABŞ Prezidenti Donald Trampın administrasiyası "Ağ Ev" ərazisində həyata keçiriləcək tikinti layihələrinə ən azı 900 milyon dollar xərcləməyi planlaşdırır. Bu vəsaitin əhəmiyyətli hissəsinin, ehtimal ki, vergi ödəyicilərinin hesabına maliyyələşdiriləcəyi bildirilir.

"PostMedia" xəbər verir ki, bu barədə "The Washington Post" əzetinin araşdırdığı sənədlərə istinadən məlumat yayıb.

Qəzetin məlumatına görə, administrasiya birbaşa Konqresdən vəsait istəmək əvəzinə maliyyəni digər federal qurumlar və özəl donorlar vasitəsilə təmin etməyi, vəsaiti isə adətən cəmi bir neçə milyon dollar olan və Ağ Evin cari təmiri üçün istifadə edilən xüsusi hesaba yönəltməyi planlaşdırır.

Gizli müqavilələr və planlaşdırma sənədləri vəsaitin Ağ Evin “modernləşdirilməsi” üçün istifadə olunacağını göstərir. Əsas layihə binanın şərq qanadında yeni bal zalının tikilməsidir.

Sənədlərə əsasən, planlaşdırılan işlərin ümumi dəyəri ən azı 927 milyon dollar ola bilər. Bal zalından əlavə, layihəyə yaxınlıqdakı Lafayet meydanının yenidən qurulması, helikopter meydançasının, ziyarətçilərin yoxlanılması üçün yeni mərkəzin və digər obyektlərin tikintisi daxildir.

Daha əvvəl yalnız bal zalının tikintisinin təxminən 600 milyon dollara başa gələcəyi bildirilmişdi. Bu məbləğin təxminən yarısının vergi ödəyiciləri tərəfindən qarşılanacağı qeyd olunurdu. Tramp özü isə dəfələrlə bal zalı layihəsinin özəl ianələr hesabına maliyyələşdiriləcəyini bildirib.

Bununla yanaşı, federal apellyasiya məhkəməsi yaxın vaxtlarda qərar verib ki, bal zalının tikintisinin davam etdirilməsi üçün administrasiya Konqresin razılığını almalıdır. Tramp qərardan apellyasiya şikayəti vermək niyyətində olduğunu açıqlayıb.

“Konqres Ağ Evdə binaların tikintisi və sökülməsini tənzimləmək üçün müstəsna səlahiyyətlərə malikdir”, – məhkəmənin qərarında deyilir.

The Washington Postun məlumatına görə, Trampın Ağ Evə qayıtmasından sonra administrasiya “Ağ Evin təmiri və bərpası” hesabına 875 milyon dollar yönəldib. Müqayisə üçün, son illərdə Konqres bu hesaba ildə təxminən 2,5 milyon dollar ayırırdı.

Ümumi məbləğin təxminən 500 milyon dolları ABŞ Məxfi Xidmətinin və Ağ Evin Hərbi İdarəsinin hesablarından köçürülüb. Daha 305 milyon dollar özəl ianələr hesabına daxil olub. Araşdırılan sənədlərdə əlavə 70 milyon dolların mənbəyi isə göstərilməyib.

Məxfi Xidmətin vəsaitlərinin böyük hissəsi – təxminən 415 milyon dollar – iyun ayında hesaba köçürülüb. Bu, Trampın Konqresdəki müttəfiqlərinin şərq qanadı və yeni ziyarətçi yoxlama mərkəzinin tikintisi üçün 400 milyon dollar ayrılmasını nəzərdə tutan qanun layihəsini qəbul etdirə bilməməsindən sonra baş verib.

Bu vəsaitin bir hissəsi əvvəlcə Konqres tərəfindən Məxfi Xidmətə əməkdaşların işə götürülməsi və hazırlanması üçün ayrılmışdı. Bu isə hər iki partiyanın qanunvericiləri arasında narahatlıq yaradıb. Onlar həmin vəsaitlərin Ağ Evdə tikinti işlərinə yönəldilməsinin qanuniliyini sual altına alıblar.

Tramp administrasiyası xərclərin vəsaitlərin ilkin təyinatına uyğun olduğunu iddia edir. Ağ Evdən həmçinin bildirilib ki, tikinti işlərinə pilotsuz uçuş aparatlarından müdafiə də daxil olmaqla zəruri təhlükəsizlik tədbirləri daxildir.

Miqyasına görə Trampın hazırkı planları Ağ Evdə 80 ildən çox müddətdə həyata keçiriləcək ən böyük yenidənqurma layihəsinə çevrilə bilər. Tarixçilər layihənin həcminin Prezident Franklin Ruzveltin dövründə həyata keçirilən iri tikinti işləri ilə müqayisə oluna biləcəyini bildirirlər.

Bununla yanaşı, ekspertlər hazırkı layihələrin maliyyələşdirilmə üsulunu qeyri-adi hesab edirlər. ABŞ Konstitusiyası federal vəsaitlərin bölüşdürülməsi səlahiyyətini Konqresə verir. Administrasiya isə vəsaitləri hesablar arasında yalnız ilkin təyinatı üzrə ayrılmış büdcə vəsaitləri çərçivəsində köçürə bilər.