Pentaqon silah istehsalının sürətləndirilməsi tələbini təsdiqləyib

ABŞ Müdafiə Nazirliyi hərbi korporasiyalardan silah istehsalını və tədarükünü artırmağı tələb edib.

“PostMedia” xəbər verir ki, Pentaqonun nümayəndəsi Şon Parnel nazirliyin ölkənin qarşılaşdığı təhdidlərə uyğun tempdə silah istehsalını təmin etmək üçün köhnəlmiş və həddindən artıq mürəkkəb satınalma sistemində islahat apardığını bildirib.

Onun sözlərinə görə, müdafiə naziri Pit Hegsetin fəaliyyətə başladığı ilk gündən nazirliyin əsas diqqəti hərbi-sənaye kompleksinin və silah arsenalının istehsal sürətində, imkanlarında və effektivliyində əsaslı dəyişikliklərə yönəlib.

Qeyd edək ki, daha əvvəl “The Washington Post” Pentaqon rəsmisi Stiven Faynberqin hərbi podratçılara silah tədarükünün tempini əhəmiyyətli dərəcədə artırmaqla bağlı planları təqdim etmək üçün üç həftə vaxt verdiyini yazıb. Faynberq mövcud silahların hazırlanması və istehsalı üzrə müddətləri qəbuledilməz adlandırıb.