ABŞ xaricdəki beş diplomatik nümayəndəliyini bağlamağı planlaşdırır

04-avqust-2026, 10:22

Yazı Ölçüsü:

ABŞ Dövlət Departamenti xaricdə yerləşən beş diplomatik nümayəndəliyin bağlanması niyyəti ilə bağlı Konqresi məlumatlandırıb.

"PostMedia" xəbər verir ki, bu barədə "Reuters" agentliyi xəbər yayıb.

Məlumata görə, söhbət ABŞ-nin Qrenadadakı səfirliyinin, Yaponiyanın Naqoya, İndoneziyanın Medan və Kanadanın Vinnipeq şəhərlərindəki baş konsulluqlarının, eləcə də Kamerunun Duala şəhərində yerləşən ABŞ səfirliyinin bölməsinin bağlanmasından gedir.

Reuters qeyd edir ki, ABŞ-nin xaricdəki diplomatik şəbəkəsinin eyni vaxtda bu miqyasda ixtisara salınması hər hansı konkret geosiyasi hadisə ilə əlaqəli deyil.

ABŞ Dövlət Departamenti nümayəndəliklərin bağlanması planlarını birbaşa təsdiqləməsə də, qurum xaricdə ABŞ-ın "effektiv və səmərəli" diplomatik təmsilçiliyini təmin etməyə çalışdığını və bu prosesdə Konqresin məlumatlandırılması ilə bağlı müəyyən edilmiş prosedurlara riayət etdiyini bildirib.