Vuçiç avqustda istefa verməyə hazırlaşır

Serbiya Prezidenti Aleksandar Vuçiç avqustun əvvəlində və ya sentyabrın əvvəlində istefasını elan edə biləcəyini və ölkədə növbədənkənar parlament seçkilərinin yaxın üç-dörd ay ərzində keçirilə biləcəyini açıqlayıb.

"PostMedia" xəbər verir ki, Vuçiç gələcək siyasi planları ilə bağlı qərarın açıq şəkildə elan ediləcəyini və vətəndaşlar üçün sürpriz olmayacağını bildirib. Eyni zamanda, o, prezidentlikdən getdikdən sonra baş nazirliyə namizəd olub-olmadığı ilə bağlı suala cavab verməyib.

Daha əvvəl, 27 iyunda Vuçiç "bir neçə həftə ərzində" dövlət başçısı vəzifəsindən istefa verəcəyini və hakim Serbiya Proqressiv Partiyasının qarşıdan gələn parlament seçkilərində qalib gəlməsinə kömək etmək niyyətində olduğunu açıqlamışdı. Bundan əvvəl o, növbədənkənar səsvermənin sentyabrın sonu ilə noyabrın ortaları arasında keçirilə biləcəyini bildirmişdi.