Banqladeşdən qaçan keçmiş baş nazir bu il vətəninə qayıtmaq istəyir

Banqladeşdən qaçan keçmiş baş nazir Şeyx Hasina insanlığa qarşı cinayətlər ittihamı ilə qiyabi olaraq ölüm cəzasına məhkum edilməsindən bir neçə ay sonra verdiyi və bazar günü dərc olunan müsahibəsində bildirib ki, “bu il” ölkəyə qayıtmaq niyyətindədir.

"PostMedia" xartici KİV-lərə istinadən xəbər verir ki, 78 yaşlı Hasina 2024-cü ilin avqustunda ölkəni tərk edərək qonşu Hindistana qaçıb. Buna onun 15 illik sərt hakimiyyətinə son qoyan tələbə üsyanı səbəb olmuşdu.

O vaxtdan bəri o, yanvar ayında Yeni Dehlidə izdihamlı mətbuat klubunda yayımlanan nadir çıxışı istisna olmaqla, ictimaiyyət qarşısına çıxmayıb.

Hindistanın NDTV telekanalına verdiyi müsahibədə Hasina ölümdən qorxmadığını bildirib və ona qarşı çıxarılan hökmü “qanunsuz, konstitusiyaya zidd və siyasi motivli prosesin bir hissəsi” adlandırıb.

“Mənə qarşı çoxlu sui-qəsdlər hazırlanıb. Lakin hər bir sui-qəsd şəbəkəsini aşaraq... mən beş dəfə baş nazir seçilmişəm və ölkənin görünməmiş inkişafı üçün çalışmışam”, — deyə Hasina bildirib.

“Mən açıq şəkildə bəyan etmək istəyirəm: bütün maneələri və bütün sui-qəsdləri aşaraq bu il öz ölkəmə qayıdacağam”, — o, ölüm hökmünə baxmayaraq geri qayıdıb-qayıtmayacağı ilə bağlı suala cavab verərkən əlavə edib.

Ötən ilin noyabrında Dəkkə məhkəməsi Hasinanı cinayətlərin qarşısını almamaqda, qətllərlə bağlı əmrlər verməkdə və onlara təhrik etməkdə təqsirli bilərək onu asılmaq yolu ilə ölüm cəzasına məhkum edib.

Onun əvvəllər ölkənin ən populyar siyasi qüvvələrindən biri olan hakim Avami Liqa partiyasının fəaliyyəti qadağan edilib.

Hindistan və Banqladeş arasında münasibətlər 170 milyon əhalisi olan Cənubi Asiya ölkəsində fevral seçkilərində Tarike Rahmanın qələbəsindən sonra yaxşılaşıb.

Bununla belə, gərginlik qalmaqdadır: Banqladeş Hasinanın ekstradisiyasını tələb etməkdə davam edir.