ABŞ Senatının Silahlı Qüvvələr Komitəsinin sədri İranla razılaşmanı “strateji miqyaslı səhv” adlandırıb

ABŞ Senatının Silahlı Qüvvələr Komitəsinin sədri, respublikaçı Rocer Uiker cümə axşamı yayımlanan yeni bəyanatda ciddi narahatlıq ifadə edərək İranla razılaşmanı tənqid edib.

"PostMedia" xəbər verir ki, bu barədə CNN məlumat yayıb.

Uiker bildirib ki, onun fikrincə, razılaşma “Əfsanəvi Qəzəb əməliyyatının nailiyyətlərini faktiki olaraq sıfıra endirir və bu, prezidentin məqsədləri ilə tam ziddiyyət təşkil edir”.

O həmçinin qeyd edib ki, İranın yenidən qurulması və iqtisadi inkişafı üçün 300 milyard dollarlıq fondun yaradılması — ABŞ vergi ödəyiciləri tərəfindən maliyyələşdirilməsə belə — 2015-ci ildə Obama dövründə əldə olunan razılaşma ilə müqayisədə İran üçün daha böyük üstünlüklər yaradır.

“İsraildən Hizbullaha qarşı əməliyyatları dayandırmasını tələb etməyi səhv hesab edirəm. Hizbullah İranın dəstəklədiyi terror təşkilatıdır və İsrailin şimal sərhədində hücumlarını davam etdirir”, – deyə senator bildirib.

Uiker həmçinin danışıqların davam etdirilməsi qarşılığında İrana qarşı sanksiyaların yumşaldılmasına və İran aktivlərinin dondurulmasının ləğvinə də qarşı çıxıb.

“İranın daha 60 gün danışıqlara razı olması müqabilində ABŞ sanksiyalarının ləğv edilməsinə və ya İran aktivlərinin dondurulmasının aradan qaldırılmasına da qarşıyam”, – deyə o əlavə edib.