ABŞ Senatı Trampın İran məsələsində hərbi səlahiyyətlərini məhdudlaşdıran qətnaməni rədd edib

ABŞ Senatı Prezident Donald Trampın İranla bağlı hərbi səlahiyyətlərini məhdudlaşdırmağı nəzərdə tutan qətnaməni qəbul edə bilməyib.

"PostMedia" xəbər verir ki, səsvermənin nəticələrinə görə, sənədin lehinə 47 senator, əleyhinə isə 48 senator səs verib.

Respublikaçı senatorlar Rend Pol, Bill Kessidi, Liza Murkovski və Syuzan Kollinz qətnaməni dəstəkləyiblər. Demokrat senator Con Fetterman isə onun əleyhinə səs verib.

Son aylarda ABŞ-də prezidentin Konqresin razılığı olmadan başqa dövlətə qarşı uzunmüddətli hərbi əməliyyatlar aparmaq səlahiyyətinə malik olub-olmaması ilə bağlı müzakirələr intensivləşib. Tramp administrasiyası hesab edir ki, mövcud vəziyyətdə belə məhdudiyyətlər yoxdur. Bununla yanaşı, bir çox konqresmenlər düşünür ki, bu cür hallarda yalnız icra hakimiyyətinin deyil, qanunverici hakimiyyətin də razılığı tələb olunur.

1973-cü ildə qəbul edilmiş Hərbi Səlahiyyətlər Aktına əsasən, Konqres müharibə elan etməz və ya hərbi güc tətbiqinə icazə verən qanun qəbul etməzsə, prezident 60 gündən sonra hərbi əməliyyatları dayandırmalıdır. Qanun bir dəfəlik 30 günlük uzadılmaya da imkan verir, lakin bunun üçün prezident Konqresə yazılı şəkildə bildirməlidir ki, ABŞ qüvvələrinin təhlükəsiz çıxarılması üçün əlavə vaxt lazımdır.

Konqres indiyədək İrana qarşı hərbi güc tətbiqinə razılıq verməyib və Ağ ev də belə bir icazənin alınmasının planlaşdırıldığına dair açıq siqnal verməyib.