"Bloomberg": G7-də İran və Hörmüz boğazı ilə bağlı vahid mövqe yoxdur

İran Fransada keçirilən G7 sammitində ən çətin müzakirə mövzularından birinə çevrilib və iştirakçılar arasında ümumi yanaşmanın formalaşdırılması ciddi çətinliklər yaradır.

"PostMedia" xəbər verir ki, bu barədə "Bloomberg" sammitdə iştirak edən bir rəsmiyə istinadən xəbər verir.

Onun sözlərinə görə, “Böyük yeddilik” ölkələri İran ətrafında yaranmış vəziyyətlə bağlı gələcək addımlar üzrə vahid mövqe formalaşdırmaqda problemlər yaşayır. O həmçinin bildirib ki, birgə yekun rəsmi bəyanatın qəbul olunacağı gözlənilmir.

Mənbənin məlumatına görə, G7-nin Avropa ölkələri ABŞ Prezidenti Donald Trampın Hörmüz boğazında naviqasiyanın artıq həftənin sonuna qədər tam bərpa olunacağı ilə bağlı optimizmini bölüşmürlər. Onlar eyni zamanda ABŞ və İran arasında əldə olunan razılaşmaların məzmunu barədə aydınlıq əldə etməyə çalışırlar ki, daha sonra boğazda minaların təmizlənməsi və patrul fəaliyyətləri üzrə öhdəlik götürsünlər.

Digər yüksək vəzifəli bir rəsmi bildirib ki, boğazda yükdaşımaların əhəmiyyətli artması üçün təxminən iki həftə lazım ola bilər, münaqişədən əvvəlki səviyyəyə qayıtmaq isə daha uzun vaxt aparacaq.

Onun sözlərinə görə, ABŞ-İran memorandumuna əsasən Tehran 60 gün ərzində boğazdan keçən gəmilər üçün ödəniş tələb etməyəcək. Vaşinqton bu müddəanın yekun razılaşmaya daxil ediləcəyini gözləyir, lakin sənədin tam mətni hələ açıqlanmayıb.

The New York Times-ın məlumatına görə, ABŞ rəsmiləri naviqasiya qaydalarının bərpası ilə bağlı fərqli proqnozlar verirlər: bəziləri iki həftəlik müddət deyir, digərləri isə artıq gələn cüməni qeyd edir.

Daha əvvəl Donald Tramp bildirmişdi ki, Hörmüz boğazı artıq qismən açılıb və cüməyə qədər tam açılacaq.